Kolegji Zgjedhor ka nisur shqyrtimin e padisë së partisë Uniteti Kombëtar, që lidhet me dekretin e presidentit për anullimin e 30 qershorit.
Trupi gjykues i Kolegjit Zgjedhor që do të japë vendimin, përbëhet nga: Ridvan Hado, Tomor Skreli, Artur Malaj, Lindita Sinanaj dhe Mustafa.
PUK i kërkoi KQZ-së çregjistrimin nga zgjedhjet, pas dekretit të Ilir Metës që anullonte mbajtjen e procesit në këtë datë.
Pasi kërkesa e PUK u rrëzua nga KQZ, aleatja e Ramës iu drejtua Kolegjit me një ankimim, i cili në thelb i shërben socialistëve përsa i takon ligjshmërisë së dekretit.
Sipas ekspertëve ligjorë, gjykata e cila mund të shprehet lidhur me dekretet e Presidentit është ajo Kushtetuese. Por socialistët pretendojnë se Gjykata përmes një vendimi i ka cilësuar dekretet për zgjedhjet si akte administrative, çka do të thotë se ato mund të gjykohen në një Gjykatë Administrative.
Por vetë socialistët nuk kanë bërë asnjë ankimim në gjykatë mbi dekretin, ndërsa rolin e saj e mori KQZ, që përmes 4 anëtarëve socialistë u shpreh për mosnjohjen e dekretit që anullon zgjedhjet më 30 qershor.
Tashmë, Kolegji Zgjedhor përmes ankesës së PUK do të mund të shprehet lidhur me 30 qershorin, edhe pse palët sërisht janë të ndara nëse dekreti mund të merret në shqyrtim nga çdo gjykatë apo vetëm nga Kushtetuesja.