Nga Boldnews.al
Partia Socialiste ka nisur zbatimin e planit “Gjushi” për të detyruar punonjësit e administratës dhe familjarët e tyre që të paraqiten në zgjedhjet mono-partiake të 30 Qershorit.
Zyrtarët më të lartë të maxhorancës janë angazhuar ditët e fundit për të aplikuar skemën e “Patronazhimit”, një sistem i zbatuar fillimisht nga kryetari në ikje i Bashkisë së Durrësit, Vangjush Dako.
Në fushatë zgjedhore, Dako angazhonte strukturat e Partisë Socialiste që të zhvillonin kontakte me qytetarët në çdo pallat, grup pallatesh e lagjesh, të cilëve u shënonin shqetësimet dhe u merrnin përsipër zgjidhjen e tyre, në këmbim të votave, pavarësisht se më pas shkëpusnin çdo komunikim.
Një skemë e tillë, por e ngritur në nivel administrativ, po kërkohet me ngulm të aplikohet së fundmi nga drejtuesit kryesorë të Partisë Socialiste. Në takime të ndryshme, Gramoz Ruçi, Taulant Balla e të tjerë koordinatorë të “Rilindjes” në bazë, kanë kërkuar nga titullarët e institucioneve që të hartojnë listat e punonjësve në varësi të tyre dhe familjarëve, të cilët duhet të jenë detyrimisht pjesëmarrës në zgjedhje.
Sipas kësaj skeme të “Patronazhit”, vëzhguesit e Partisë Socialiste kanë informacionin e detajuar jo vetëm mbi punonjësit e administratës, por edhe të familjarëve të tyre, të cilët kanë të drejtë vote.
Roli i këtyre vëzhguesve do të jetë evidentimi i pjesëmarrësve dhe, sidomos i atyre që nuk marrin pjesë.
Në rastet kur ka punonjës të administratës apo familjarë të këtyre të fundit, të cilët nuk paraqiten ditën e votimit, atëherë do të kërkohet përgjegjësia politike dhe administrative tek titullari i institucionit dhe punonjësit që nuk kanë votuar apo që nuk kanë bindur familjarët e tyre të votojnë.
Koordinatorët e Kryesisë së Partisë Socialiste ua kanë bërë të qartë titullarëve të institucioneve që një angazhim jo-efektiv në sigurimin e votave të plota të vartësve të tyre dhe personave të afërt, do të ndikojë drejtëpërdrejtë në karrierën zyrtare.
Skema e “Patronazhimit” konsiderohet nga Partia Socialiste si mekanizëm për fitore “morale” të zgjedhjeve lokale. Kur maxhoranca po përgatitet që të shkojë në një zgjedhje pa asnjë rival, fitorja “formale” nuk vihet aspak në dyshim.
Por, ajo për të cilën ka nevojë Edi Rama dhe “Rilindja” e tij është fasada e “zgjedhjeve normale”. Maxhorancës u duhen masivitet votash, për të treguar se qytetarët shqiptarë janë kundër bojkotit.
E, për të arritur këtë qëllim propagandastik, “Rilindja” ka nisur kërcënimin e paprecedentë të titullarëve politikë të institucioneve dhe sidomos nëpunësve të thjeshtë administrativë. Si drejtuesit, ashtu edhe punonjësit, duhet të mbajnë përgjegjësinë e tyre jo vetëm për veten, por edhe për personat e familjes, në një sistem që përafron ndjeshëm me periudhën e komunizmit në Shqipëri.
