Shtyrja e vendimit të Gjykatës së Arbitrazhit Sportiv në lidhje me çështjen e dënimit të Skënderbeut nga ana e UEFA-s duket se i ka dhënë menjëherë pasojat e saj në lidhje me frenimin e merkatos së korçarëve për sezonin e ri.
Pikërisht caktimi i datës 12 korrik si afati për të nxjerrë përfundimisht relacionin nga ana e KAS duket se ka “shtyrë” drejt një ekipi tjetër dy nga futbollistët që ishin të destinuar për të përfunduar në Korçë. Bëhet fjalë pikërisht për Sabjen Lilajn dhe Albano Aleksin, të dy lojtarë që ishin ndër pretendimet e Skënderbeut në merkato. Në kushtet kur vendimi vonoi dhe Skënderbeu humbi të drejtën e pjesëmarrjes në Europë dhe, mbi të gjitha, dilema për të ardhmen, çuan Lilajn drejt finalizimit të transferimit në Izrael.
Ndërsa Aleksi kaloi te Teuta në Durrës. Të dy këta futbollistë duket se kishin arritur në parim akordin me Skënderbeun për të qenë pjesë e klubit bardhekuq për sezonin e ri, por që vonesa e vendimit nga KAS u bë pengesë dhe devijim për të dy mesfushorët.
KËRKESA PËR “SENATORËT”
Nga ana tjetër, korçarët duket se të kushtëzuar nga vendimi i KAS, e kanë të pamundur për të nisur merkaton. Klubi ka shtyrë çdo gjë për në datën 12 të muajit të ardhshëm dhe në kushte të tilla rrezikon që të mbetet edhe pa futbollistë cilësorë për të ardhmen. Përgatitjet për sezonin e ri po vonojnë dhe teksa një pjesë e mirë e ekipeve kanë filluar afrimet e para, Skënderbeu nuk e ka filluar ende asgjë për sezonin ’19-’20.
Por, nga ana e tij, klubi duket se është duke menduar fillimisht për të blinduar lojtarët me të cilët kërkon të zgjasë bashkëpunimin për sezonin e ardhshëm. Janë pesë futbollistë që janë pa kontrata me Skënderbeun, mes të cilëve edhe senatorë si Marko Radas, Gjergji Muzaka dhe Leonit Abazi. Për ta zërat në merkato kanë filluar të ndihen dhe klubi ka menduar që t’u paraprijë.
Burime për gazetën bëjnë me dije se lojtarët janë kontaktuar nga bardhekuqtë duke u kërkuar që të bëjnë durim deri në datën 12 korrik sapo të njihen me vendimin për të nisur më pas procedurat e rinovimit. Dukshëm që situata nuk është aspak e favorshme, pasi kjo zgjatje e kësaj çështjeje ka sjellë edhe dyshime te futbollistët në lidhje me të ardhmen e tyre. Gjithsesi, në kampin bardhekuq besojnë se gjithçka do të mbyllet pozitivisht dhe Skënderbeu do të nisë përgatitjet për sezonin e ri menjëherë pas 12 korrikut.
