Gjykata e Apelit për Krime të Rënda ka vendosur të pranojë kërkesën e të pandehurit Blerim Shullazi për përjashtimin e gjyqtares Saida Dollapi nga “çështja Shullazi”.
Pas kërkesës bërë më herët nga pala e pandehur, një tjetër trupë gjykuese e ka marrë në shqyrtim dhe ka vendosur në favor të palës së pandehur, për përjashtimin e Dollanit.
Debatet në seancë – Seanca e sotme u shoqërua me debate mes palës së pandehur dhe gjyqtarëve. Gilmando Dani, pjesë e grupit Shullazi, i ka kujtuar gjyqtares Albana Boski për t’u tërhequr nga gjykimi në çështjen “Shullazi”, pasi sipas tij ajo ka gjykuar çështjen “Vollga” në Durrës. Gjyqtarja Boksi, e cila tashmë është kryesuese në këtë proces, është shprehur: “Faleminderit për paralajmërimin”.
Seanca është shtyrë për në datën 24 qershor, në orën 11:00 pasi KLGJ akoma nuk ka caktuar gjyqtarin e tretë në këtë çështje. Pritet që Apeli për Krime të Rënda tanimë të shqyrtojë edhe kërkesën për përjashtimin e Albana Boksit.
Në nëntor 2018, Gjykata e Krimeve të Rënda dha vendimin për pjesëtarët e bandës, duke i dënuar në total me 55 vite burg (Emiljano Shullazi 14 vjet burg; Gilmando Dani 12 vjet; Endri Qyqa 10 vjet; Endri Zela 10 vjet; Blerim Shullazi 9 vjet burg). Mbrojtja apeloi vendimin dhe çështja po shqyrtohet tanimë në Apel. /BN/
