Ministri i Jashtëm në Detyrë, Gent Cakaj, ndryshe nga shefi i tij i cili i dha këtë detyrë , nuk mendon se shtyrja e negociatave për në tëtor është lajm pozitiv. Ndërsa deklaroi në konferencen e tij për shtyp menjëherë pas dhënies së vendimit nga BE, se mungesa e vendimit erdhi për shkak të mospasjes së kohës nga ana e shteteve anëtare për të parë progresin e Shqipërisë, Cakaj e tha troç se lajmi për shtyrjen nuk është inkurajues.
“Shqipëria nuk mund të përcaktojë axhendën e vendimmarrjes së Këshillit por mund të përmbushë të gjitha kushtet teknike. Ndaj duke u mbështetur edhe në zotimin e prerë të Këshillit, jo për të diskutuar në tetor nëse negociatat do të hapen apo jo por për të marrë një vendim të prerë, Shqipëria mbetet shpresëplotë për një vendim pozitiv në tetor. Shpresa jonë duhet të marrë trajtën për një angazhim pozitiv. Shtyrja e vendimmarrjes sidoqoftë nuk është një lajm inkurajues për Shqipërinë. E ka merituar hapjen e negociatave që në qershor të vitit të shkuar. Shqipëria ka merituar hapjen e negociatave që vitin e shkuar por sidoqoftë që vitin e shkuar Shqipëria ka filluar procesin e screen-it. Që nga viti i shkuar Shqipëria nuk ka humbur asnjë moment në axhendën e saj. Sot më shumë se kurrë në këtë periudhë, përpjekjet tona duhet të shtohen që të sigurojmë një vendim pozitiv në tetor. Shtyrja e vendimmarrjes nuk është as shkas për sjellje të matura politike por as të përkthehet në rënie të energjive reformatore. Shqipëria duhet të vazhdojë në këtë rrugë me përpjekje”.
