Këshilli Europian do t’i kthehet çështjes së hapjes së negociatave për Shqipërinë dhe Maqedoninë e Veriut për një vendim të qartë jo më vonë se në Tetor. Data për vendimin jepet në raportin e publikuar ditën e sotme nga KE.
Kryeministri Edi Rama e quajti lajm të mirë, ato që ndodhën në Luksembug gjatë takimit të liderëve të vendeve të BE-së, ndërsa Gent Cakaj, ministri i Jashtëm tha se Shqipëria mbetet shpresëplotë për një vendim pozitiv në tetor. Ndërkohë, kreu i grupit parlamnetar soclais, Taulant Balla, gjatë një interviste në një studio televizive shprehu sigurinë se negociatat do të hapen.
Megjithatë nga kampi opozitar nuk duken kaq optimist. Nga PD u deklarua se me Ramën kryeministër nuk ka hapje të negociatave.
Klajda Gjosha, ish-ministre e integrimit në qeverinë “Rama 1”, mban të njëjtin qëndrim. Sipas saj, tetori nuk ofron siguri për hapjen e negociatave.
”Shtetet anëtare kanë pasur një debat të fortë mbi procesin e integrimit të Shqipërisë, mundësinë e ndarjes nga Maqedonia e Veriut si dhe shtyrjen e datës së shqyrtimit të raportit të Komisionit Europian. Kjo tregon se vendet anëtare nuk janë të bindura me ecurinë e Shqipërisë në këtë proces madje nga gjuha e përdorur duket qartë se edhe tetori nuk ka asnjë siguri për një dakordësi të mundshme për çeljen e negociatave”, u shpreh ajo në një deklaratë për “Koha Jonë”.
