Sezoni i fundit ishte më i vështiri për Skënderbeun. E megjithatë, klubi, stafi dhe vetë lojtarët ndihen të lehtësuar, pasi të pakën siguruan objektivin minimal (u renditën të 4-it dhe matematikisht kapën zonën “Euro”, paçka se vendimi i takon KAS-it). I këtij mendimi është edhe Leonit Abazi.
Në një intervistë të dhënë për “Panorama Sport”, ai “skanon” kampionatin e fundit, por nuk ka ngurruar që të flasë për të ardhmen. Me kontratë të skaduar, ai pranon se klubi e ka kontaktuar për rinovimin, por në të njëjtën kohë zbulon edhe ofertat që i kanë ardhur nga ekipe të tjera. Madje, del hapur dhe me emrat, ndërsa përmend edhe Partizanin.
Leonit, si ishte sezoni i fundit?
Më i vështiri. Përkundër të gjitha problemeve që kemi pasur në nisje të sezonit, ia dolëm të arrinim në objektivat që kishim në fillim. Objektivat që ishin përcaktuar nga klubi.
Çfarë ndodhi që Skënderbeu pësoi atë luhatje?
E nisëm shumë mirë, duke marrë edhe një trofe. Sollëm në Korçë Superkupën e fituar përballë Laçit. Edhe kampionati nisi ashtu siç deshëm, ku gjatë fazës së parë ishim kryesues. Por, pastaj çaluam në shumë ndeshje radhazi. Ishin ndeshje të rëndësishme, që nuk duhet të kishim gabuar.
Mos ndoshta ndikoi mungesa e eksperiencës te disa lojtarë apo vendimi i KAS-it?
Ndonjëherë eksperienca është më shumë e rëndësishme sesa kualiteti. Besoj se kjo ka ndikuar më shumë. Por, përtej kësaj, edhe presioni te disa lojtarë ishte më i madh sesa duhej. Unë personalisht gjykoj mirë dhe jam i kënaqur me lojtarët e rinj nga ajo që kanë treguar në fushë në pjesën më të madhe të sezonit. Janë e ardhmja dhe kanë dhënë maksimumin në këtë sezon aspak të lehtë.
Në aspektin personal, si ishte ky sezon për Abazin?
Ky ka qenë një sezon shumë i mirë për mua personalisht. Kam zhvilluar një edicion të plotë dhe besoj se në një nivel të kënaqshëm. Jam i kënaqur në tërësi.
Çfarë i mungoi Skënderbeut për të luftuar për titullin deri në fund?
Sikundër e thashë edhe më lart, bëmë disa gabime në ndeshje të caktuara. Jemi të bindur se kemi dhënë gjithçka. U munduam deri në fund të qëndrojmë lart, por në disa raste na penalizoi edhe fati. Nuk ishte me ne dhe nuk bëmë dot më shumë.
Pas kaq shumë vitesh në krye të kampionatit, sa e vështirë ishte për ju të pranonit vendin e katërt?
Sigurisht, nuk isha i lumtur që ishim në vendin e katërt në renditje, pasi jemi mësuar me titullin kampion. Por, nuk kemi pengje pasi ne dhamë gjithçka. Nuk mund të kesh pishman në momentin që një lojtar jep gjithçka nga vetja.
Kontrata juaj mbaroi në qershor, ndaj duam të dimë cili do të jetë destinacioni i ri i Abazit. Do të qëndroni në Korçë apo…?
Kontrata ime ka përfunduar në fund të këtij sezoni. Klubi më ka ofruar kontratën e re për bashkëpunim. Jam duke e vlerësuar me qetësi, pasi nuk e di si do të rrjedhin gjërat. Por, përveç Skënderbeut që është primari për mua, kam pasur kontakte nga shumë ekipe.
Bëhet fjalë për klube në Shqipëri apo jashtë, a mund të na zbuloni ndonjë prej tyre?
Po, mund të them ekipet me të cilat kam pasur kontakte. Behet fjalë për Prishtinën, Partizanin, Laçin dhe Gjilanin. Në fakt, janë edhe dy ekipe të tjera, por s’mund t’i them për momentin.
Mendoni se Skënderbeu do dalë i pafajshëm nga KAS që pritet të vendosë këto ditë?
Unë fillimisht dua t’u shpreh falënderimet tifozëve korçarë që na përkrahën edhe në momentet kur kishim më së shumti nevojë. Sigurisht, mendoj që Skënderbeu do të dalë i pafajshëm nga KAS-i.
/Panorama Sport