Aksidenti tragjik ku humbën jetën 4 pjesëtarë të familjes Bib aka ndodhur në afërsi të rrethrrotullimit pranë TEG, në aksin Elbasan-Tiranë.
Aksidenti ka ndodhur rreth orës 02:00 të mëngjesit të sotëm, ndërsa pjesëtarët e familjes Biba udhëtonin nga Elbasani drejt Tiranës, pasi kishin festuar një ditëlindje.
Në drejtimin e mjetit ishte shtetasi Arlind Aliaj, i afërm i familjes Biba.
Automjeti tip BMW me targa AA472 PE, pothuajse është shkatërruar, si rezultat i përplasjes fillimisht me bordurën dhe më pas ka dalë nga rruga ku është përmbysur.
Përplasja ka qenë e fortë, duke rezultuar fatale për kryefamiljarin Bujar Bibaj 58-vjeç, bashkëshorten e tij Flutura Bibaj, si dhe dy vajzat Valentina Bibaj dhe Xhuliana Bibaj.
Ndërkohë që drejtuesi i mjetit ndodhet në spital në gjendje të rënduar shëndetësore.
Mësohet se automjeti ka ecur me shpejtësi mes për mes rrethrrotullimit, duke mos ndjekur trajektoren normale, por ka vijuar drejt.
Dyshimet e para janë se drejtuesi i mjetit ose ka qenë në gjendje të përgjumur dhe ka kryer manovrimin, duke shkelur rregullat e qarkullimit në një rrethrrotullim, ose ka qenë me shpejtësi të lartë dhe nuk ka mundur të manovrojë.
Fillimisht mjeti është përplasur me bordurën anësore, dhe më pas ka përfunduar jashtë rrugës ku është gjetur i përmbysur.
Fakti se aksidenti ka ndodhur në orët e para të mëngjesit, kur dhe s’ka pasur lëvizje të shumta mjetesh, ndoshta ka bërë që njoftimi për ngjarjen tragjike dhe kërkesa për ndihmë të bëhej me vonesë.
Në vendin ku ka ndodhur aksidenti tragjik është vendosur një buqetë me lule, në kujtim të 4 pjesëtarëve të familjes që u shua.
Videot e mëposhtme tregojnë atë se çfarë ka mbetur nga mjeti, ndërsa në rrugë duken gjurmët e aksidentit tragjik.