Nga Boldnews
Presidenti i Republikës ka anulluar me një dekret mbajtjen e zgjedhjeve më 30 qershor. Dekreti ka hyrë në fuqi, është botuar në Fletoren Zyrtare, ndërsa përveç një vendimi të KQZ që nuk njeh dekretin, nuk ka asnjë vendim tjetër ligjor të dhënë nga gjykatat, lidhur me aktin e Presidentit.
Por ajo që po ndodh përveç faktit se Edi Rama dhe Rilindja po vijon fushatën, janë kërcënimet ndaj shqiptarëve që do të tentojnë të prishin procesin. Rama thotë se kush prek zgjedhjet dënohet nga 1 deri në 5 vjet burg.
Por cilat zgjedhje?
Referuar dekretit të Presidentit me 30 qershor nuk ka zgjedhje, ç’ka do të thotë se ligjërisht ajo ç’ka mund të tentojë të bëjë Rama me anëtaret e tij në KQZ mund të jetë gjithçka, por jo zgjedhje. Ndoshta mund të konsiderohen zgjedhje brenda Rilindjes, të cilat po administrohen nga 4 Rilindas nën petkun e anëtarëve të KQZ.
Atëherë pyetja që lind është mbi cilin ligj Rama kërcënon qytetarët me burg?
Kjo është njëlloj sikur sot apo nesër Presidenti të deklarojë pasojat ligjore ndaj të gjithë atyre që shpërfillin dekretin e tij, apo sikur çdo taksapagues shqiptar të përdorë çdo mjet për të mbrojtur paratë që derdh në buxhet, dhe që Rama me një grup kamikazësh në KQZ dhe kudo tjetër po i hedh në kosh për një palë votime që me dekret janë anulluar.
Me pak fjalë, Rama po kërkon me çdo kusht përplasjen, ndoshta e ëndërron me përmasa të mëdha. Rruga më e thjeshtë është që dëshira që ka ti plotësohet. Më e vështira është që kokat e ftohta në PS, ata që ende mund të kenë një grimcë dinjiteti, të shpëtojnë kapterin Rama nga gjendja ku ndodhet.
