Nga Boldnews.al
Gjykata Kushtetuese ishte institucioni i parë që u ekzekutua nga Reforma rilindëse e Drejtësisë. Anëtarët e Kushtetueses u gënjyen nga Edi Rama, i cili u premtoi karrierë të pashqetësuar, nëse nuk do të rrëzonin ligjin kontrovers të Vetingut.
Të joshur apo edhe nën presion, Gjykata Kushtetuese, në vitin 2017, e konsideroi të rregullt ligjin e Vetingut, nga i cili e pësuan një nga një, 8 nga 9 anëtarët e saj.
Me një Gjykatë Kushtetuese inekzistente, Edi Rama nuk kishte asnjë pengesë për të miratuar ligje dhe projekte PPP, i pashqetësuar nga asnjë organ shtetëror.
Partia Socialiste në Kuvendin e Shqipërisë miratoi vetëm me votat e saj ligjin famëkeq të njohur si “Fusha”, ku, me një të rënë të lapsit u vendos shkatërrimi i Teatrit Kombëtar për ngritjen e një kompleksi kullash në qendër të Tiranës.
Kundërshtarëve të këtij ligji, Edi Rama, me qësëndi, u tregonte se mund të ankoheshin në Gjykatën Kushtetuese, një institucion i ekzekutuar totalisht nga ish-vartësit e tij, sot anëtarë të komisioneve në Vetingut.
Në mungesë të Gjykatës Kushtetuese, Edi Rama dhe qeveria e tij vijuan, tërësisht të pashqetësuar, projektet PPP, të cilat po privatizojnë të gjithë resurset shqiptare, duke ua kaluar disa “klientëve qeveritarë”.
Por, krahas përfitimeve, mungesa e Gjykatës Kushtetuese mund t’i sjellë humbjen e pushtetit kryeministrit Edi Rama.
Në një klimë të ashpër politike, ku Parlamenti “mono-partiak” nisi procedurat për shkarkimin e Ilir Metës, pasi ky i fundit shfuqizoi dekretin për mbajtjen e zgjedhjeve lokale në 30 Qershor, Presidenti pritet të ndërmarrë një hap të rradhës, shumë të fortë.
Mesditën e së Premtes, Meta i ka dërguar një shkresë Komisionit Qendror të Zgjedhjeve, në të cilën i kërkon informacion zyrtar për numrin e deputetëve që ushtrojnë funksionin në Parlament.
Kuvendi i Shqipërisë aktualisht ka 122 deputetëve, pas djegies së mandateve nga opozita zyrtare dhe plotësimit të një pjese të vakancave.
Kushtetuta përcakton se Parlamenti i Shqipërisë përbëhet nga 140 deputetë. Me shumë mundësi, presidenti Meta po shqyrton mundësinë për nxjerrjen e një dekreti për shpërndarjen e Parlamentit, për shkak të “mosplotësimit të numrit të kërkuar nga Kushtetuta”.
Gjithësesi, Meta nuk ka shkuar ende deri në atë vendimmarrje. Por, gjithësesi, hapi i parë, ai i kërkesës për informim zyrtar nga KQZ për numrin e deputetëve në Parlament, konsiderohet si lëvizja e radhës në shahun politik që po zhvillohet së fundmi në Shqipëri.
Kushtetuta ka parashikuar kompetencën e Presidentit për shpërndarjen e Parlamentit, por nuk ka detajuar se në cilat raste kreu i shtetit e ndërmerr këtë iniciativë.
Për këtë arsye, një vendimmarrje e mundshme e presidentit Meta për shpërndarjen e Parlamentit, do të kërkojë një interpretim kushtetues. Këtë interpretim mund ta realizojë vetëm Gjykata Kushtetuese, e cila nuk ekziston.
Pra, një lëvizje e fortë e Metës për shpërndarjen e Parlamentit, do e kapë Edi Ramën në pozicion “mat”. Ai, megjithëse do ta kundërshtojë një vendim të tillë të Presidentit, nuk do të ketë gjykatë ku ta ankimojë.
Në këtë mënyrë, Edi Rama dhe ‘Rilindja” e tij do të jenë të detyruar të shkojnë në zgjedhje të përgjithshme të cilat, sipas Kushtetutës, në raste të tilla zhvillohen brenda 45 ditëve nga shpërndarja e Parlamentit.
Në zgjedhje të përgjithshme të parakohshme, ‘Rilindjes” së Edi Ramës mund të mos i dalin mirë llogaritë e “tepsisë”. Nëse lëvizja e Metës vijon sipas linjës së nisur, me shumë mundësi, Edi Rama do e shohë vetë drejtues të opozitës në Shtator.
