Zëvendëskryetari i LSI-së, Luan Rama i pranishëm në studion e emisionit “Të PaEkspozuarit” në News 24 komentoi veprimin e presidentit, Ilir Meta, i cili firmosi “live” para mediave zhdekretimin e datës së zgjedhjeve të 30 qershorit.
Ai tha se kreu i shtetit ka ndërdyrë me vonesë. Sipas Luan Ramës, retorika e kryeministrit se do të shkarkojë Ilir Metën nga posti i Presidentit është e kotë.
Gjithashtu ai pohoi se gjuha e përdorur nga kryeministri Edi Rama ka për qëllim për të shmangur vëmendjen nga skandalet politike dhe përgjimet e gazetës gjermane “Bild”.
“Në një shoqëri të lirë, në një pluralizëm politik askush nuk është i penguar për t’u angazhuar në një parti politike dhe për këtë arsye nuk ka sens që të penalizohet Kryemadhi, sepse qenka bashkëshortja e presidentit. Konflikti këtu është thelbësor. Jemi në një krizë besimi. Nuk është problemi te dekreti. Në vlerësimin tim, ndërhyrja e tij erdhi me vonesë. Kemi në Shqipëri, modele, kur liderët kanë reaguar me dorëheqje për të evituar një përplasje. Nuk është problemi se a shkarkohet apo jo presidenti. Ai nuk shkarkohet dot. Ai bën retorikën e radhës për të larguar vëmendjen për t’i ikur ballafaqimit të qytetarët pas situatës së përgjimeve të publikuara nga dosja 339 dhe nga një mori skandalesh të tjera”,-tha ai.
