Talenti korçar firmos me Besën: Më bindi projekti i Maganit

19-vjeçari Klevis Shaqe ka firmosur me Besën e Kavajës që sezonin e kaluar e mbylli me Tomorrin në Kategorinë e Parë, më parë ka qenë pjesë e moshave të Skënderbeut. Mesfushori korçar ka firmosur një kontratë 4-vjeçare me verdhezinjtë.

Për SportEkspres, Shaqe deklaron se kontrata me Tomorin i mbaroi, por shpreh keqardhjen që skuadra zbriti në Kategorinë e Dytë. “Me Tomorin kalova një sezon të mirë, por më vjen keq që nuk ja arritëm mbijetesës në Kategorinë e Parë. Skuadra bëri shumë gabime, kryesisht pas fazës së dytë, por edhe fatin nuk e kishte shumë me vete. Gjithsesi, për mua ishte një përvojë që shpresoj të më shërbejë në vazhdimësinë e karrierës sime”.

Dhe menjëherë sapo sezoni i mbyll, Magani e kishte veçuar korçarin në planet e tij, për ta bërë realitet këtë verë. “Duke qenë lojtar i lirë, kisha edhe dy oferta të tjera në Kategorinë e Parë, por Besa më bindi me projektin e saj, sepse është skuadër që synon ngjitjen në Kategorinë Superiore. E mendoj një sezon më të fortë se me Tomorin, ndaj do jap maksimumin që të bind trajnerin Magani me formën time më të mirë”.

LEXO EDHE  Koha e rregullt e mbyllur barazim, 34 penallti për të vendosur fituesin