Ligoraq Karamelo, deputet i “opozitës së re” ka folur sot në Kuvend kundër aktit të Presidentit të Republikës lidhur me anulimin e dekretit për zgjedhjet vendore të 30 qershorit.
I vënë në shërbim të Rilindjes, ashtu si shumica e deputetëve që pranuan mandatet pasi PD dhe LSI i dorëzuan ato më 21 shkurt, Karamelo tha se Presidenti ka shkelur Kushtetutën dhe ka tejkaluar kompetencat.
Duket se deputeti i qarkut të Korçës, i zhdukur prej së paku 12 vitesh nga skena politike, po shfrytëzon mandatin si deputet për t’i shërbyer Edi Ramës dhe Rilindjes, në një kohë kur prej muajsh vendi ndodhet në një krizë politike të fortë, që rrezikon madje edhe përplasje civile.
Karamelo, që aksidentalisht u fut në listat e kandidatëve për deputet, si pjesë e marrëveshjes së PD me partitë aleate, një prej të cilave edhe PBDNJ, duket se pati fatin të ringjallet nga Rilindja.
Një politikan me karrierë relativisht të gjatë, pavarësisht peshës politike, Karamelo ka zgjedhur të jetë në krah të Rilindjes dhe Ramës, jo më shumë për bindje politike.
Ai thjesht duket se po luan rolin e një prej komardareve që Rama ka vendosur t’i mbajë si shpëtim për anijen e Rilindjes që po fut ujë gjithandej.
Të njëjtën gjë ka bërë edhe më parë me kryeministrat e kohës, pavarësisht emrave që kishin dhe kush e drejtonte PBDNJ.
Sot duket se Rilindja e nxorri nga “varri” që mes shumë anonimëve që kanë sot mandatin e deputetit, të jetë edhe dikush që ka vite në politikë, që kundërshton dekretin për shtyrjen e zgjedhjeve.
