Kushtetuta, Meta dhe Rama që do të bëhet “mbret”

Nga Boldnews.al

Akti më i fundit i Presidentit të Republikës Ilir Meta për anullimin e datës së zgjedhjeve lokale të 30 qershorit, ka sjellë zemërimin deri në histerizëm të Partisë Socialiste dhe kryeministrit Edi Rama. Shkarkimi i kreut të shtetit nuk është më çështje kërcënimi për lojëra politike, por një nismë procedurale e marrë përsipër nga deputetët socialistë që kanë nisur të mbledhin firmat për shkarkim.

Rama i ka numrat, të paktën 94 deputetë i ka gati për ti vënë në rresht, kur në Parlament sot janë opozitarët e rinj të emëruar dhe kontrolluar prej tij. “Zgjedhjet do mbahen më 30 qershor dhe Meta do të shkarkohet”. Ky është qëndrimi i prerë i kryeministrit Edi Rama që së fundmi kërkon që të marrë edhe institucionin e vetëm të pavaruar, presidencën.

Është e rëndë si po vepron Rilindja në këtë rast dhe shumë të tjera, por fort e kuptueshme që nuk ka hequr dorë nga geni i së shkuarës. Për këtë mjafton që të lexohet rezoluta e dalë sot nga Parlamenti. “Kuvendi i Shqipërisë i bën thirrje Presidentit të Republikës të reflektojë duke kthyer institucionin e Presidentit në kufijtë e kompetencave të njohura nga Kushtetuta dhe të mos ndërrmarrë asnjë veprim tjetër në shkelje flagrante të Kushtetutës“, thuhet në rezolutë.

Pra i bën thirrje të “reflektojë” të “thellohet”, të bëjë “autokritikë” dhe më pas do të jetë “Organizata bazë e partisë dhe ‘udhëheqësi’ ynë i dashur Edi Rama që do të vendosë për fatin e mëtejshëm të presidentit dhe vetë institucionit të Presidencës.

LEXO EDHE  3 vjet nga Reforma në Drejtësi/ "Shpërthen" ish-deputeti: Sistemi nën kontrollin mafioz të Ramës

Kushtetuta parashikon se në vetëm dy raste mund të shkarkohet kreu i shtetit. “Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij. Vendimi i Kuvendit i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra”, – thuhet në nenin 90 të kushtetutës.

Jemi para një akti që kryeministri dhe drejtuesit e lartë të Partisë Socialiste po kthehen në Gjykatë Kushtetuese, që sipas tyre kreu i shtetit ka shkelur ligjet dhe Kushtetutën e vendit dhe si i tillë duhet të shkarkohet.

Partia është “mbi të gjitha”…. Në rast se nisma vijon deri në fund, atëherë përfundimisht kreu i shtetit duhet të ikë i shkarkuar, në një rast vërtetë të paprecedent, por “precedentët” po krijohen pafund për të vendosur përfundimisht sistemin njëpartiak të Ramës i cili përfundimisht do të kërkojë të kapë edhe presidencën.

Asgjë nuk është rastësi, pasi ka kapër të gjithë pushtetet tashmë nuk i mbetet gjë tjetër përveçse të realizojë “ndryshimet Kushtetuese” për ta shpallur Shqipërinë Monarki. Kurora i takon vetëm një njeriu, ai është Edi Rama….!