Gjykata e Lartë greke ka refuzuar kërkesën e palës shqiptare për ekstradimin drejt vendit tonë të Bledar Jamebellit.
Ky i fundit është shpallur në kërkim nga autoritet shqiptare, si personi që porositi vrasjen e ish-drejtuesit të policisë Artan Cuku, në prill 2016 në Tiranë.
Bledar Jamebelli u arrestua në Greqi në dhjetor 2018, për llogari të autoriteteve shqiptare.
Jamebelli u shpall në kërkim ndërkombëtar nga ana jonë më datë 13.06.2017, pasi Gjykata e Shkallës së Parë për Krimet e Rënda, me vendimin datë 12.06.2017, ka vendosur ndaj tij masën e sigurisë Arrest me burg, për veprën penale “Vrasja e Punonjësit të Policisë së Shtetit” e kryer në bashkëpunim. Ende nuk dihen hollësirat e vendimit të gjykatës greke.
Në qershor 2018, Gjykata e Krimeve të Rënda pranoi kërkesën e prokurorit Henrik Ligori, për ligjërimin e akt marrëveshjes për të dënuar me 10 vite burg Mikel Shallarin, i akuzuar si ekzekutori i komisarit Cuku. Lidhur me krimin, mbetet në arrati Krostaq Leci, i akuzuar si bashkëpunëtor në vrasje.
/bn/
