Skënderbeu është në pritje të zhvillimeve që do të vijnë në ditët e nxehta të qershorit nga Gjykata e Arbitrazhit sportiv në Lozanë dhe gjithçka ka mbetur pezull në kampin korçar. Asnjë lëvizje duket se nuk do të bëhet nga klubi edhe në kushtet kur ofertat nuk janë të pakta.
Kjo vlen jo vetëm për afrimet e mundshme në ekip për sezonin e ri, por edhe për largimet nga kjo skuadër. Pavarësisht se sezoni nuk ka qenë tejet pozitiv, por që është mbyllur me kapjen e objektivit, ka disa lojtarë që kanë rënë në vorbullën e merkatos dhe interesimi i klubeve të huaja ka qenë i lartë për ta.
Në këtë pikë nuk mund të mungonte emri i Dejvi Bregut. Xhevahiri i Skënderbeut në këtë sezon ka qenë një prej lojtarëve më të vëzhguar në radhët e kampionëve të sezonit të kaluar, aq sa në shumë ndeshje nuk kanë munguar në tribunë edhe të dërguar të klubeve të huaja për të ndjekur nga afër lojtarin. Klubi i parë që ka shfaqur interes ka qenë Dinamo e Bukureshtit, por oferta nuk e ka bindur Skënderbeun.
Korçarët kanë qëndruar në pritje derisa ditët e fundit duket se ka dalë në skenë pistë tjetër që e çon futbollistin vlonjat drejt Zvicrës. Burime pranë klubit bëjnë me dije se në drejtim të Bregut ka mbërritur një ofertë nga ekipi i Sionit në Zvicër, ekip i cili është interesuar gjatë për shërbimet e sulmuesit vlonjat.