Kryeministri Edi Rama do të deklaronte të dielën nga Dibra, se Ilir Meta e ka humbur të drejtën të qëndrojë në zyrën e Presidentit.
Një ditë më pas, Elisa Spiropali, ministre e Shtetit, në përfundim të mbledhjes së Kryesisë së PS-së, deklaronte nisjen e procedurave për shkarkimin e Metës.
Të enjten Kuvendi ka parashikuar një mocion me debat me kërkesë të deputetëve socialiste. Por në kërkesë nuk specifikohet shkarkimi i Presidentit, edhe pse pas miratimit të një rezolute, socialistët mund të vijojnë procesin për shkarkimin formal të tij, pasi zyrtarisht nuk mund të bëjnë asnjë lëvizje përsa kohë s’ka Gjykatë Kushtetuese funksionale.
Mesa duket socialistët do të përdorin seancën e së enjtes për të testuar sa vota mund të mbledhin, pra nëse mundet të bëjnë shifrën 93 deputetë për shkarkimin e Presidentit.
Ndërkohë, ministri Eduart Shalsi, mbrëmjen e sotme në emisionin Tempora, i është shmangur pyetjes së drejtpërdrejtë nëse Ilir Meta do të shkarkohej nga posti i Presidentit.
Biseda
Shalsi: Duhet ta ngrejmë nivelin e debatit në realisht çfarë nuk shkon në Shqipëri. Sepse realisht ato që po thuhen nëpër banaqe nuk janë ato që po shqetësojnë shqiptarët. Ndaj kriza është e stisur.
Meço: Jua lëmë shqiptarëve që ta thonë atë që i shqetëson. Do ta kërkoni shkarkimin e Ilir Metës të enjten.
Shalsi: Ditën e enjte kemi parashikuar një mocion me debat. Është caktuar një minutazh i caktuar ku forcat në mazhorancë dhe opozitë, do të flasin.
Meço: Ju do të nisni procedurat si mazhorancë për shkarkimin e presidentit të Republikës, ditën e enjte,. Po apo jo?
Shalsi: Duroni deri të enjtën. Ndiqni seancën parlamentare të së enjtës. Do keni kohë të kuptoni edhe se çfarë do bëhet. E rëndësishme është që duhet të flasim për reformën në drejtësi.
