Orges Shehi u largua pas 9 vitesh nga Korça dhe ky lajm i ka gjetur të papërgatitur lojtarët. Nuk e prinin një këtë vendim kaq të befasishëm, e megjithatë janë munduar që ta mirëkuptojnë. Marko Radas është një prej tyre. Ai ka mbetur disi i tronditur nga deklarata e 41-vjeçarit, ndërsa thekson se Skënderbeut po i largohet një pjesë e historisë.
Në një prononcim të dhënë për “Panorama Sport”, kroati mundohet që të analizojë situatën e krijuar pas ikjes së ishportierit, ish-kapitenit dhe tashmë ish-trajnerit. “Të them të drejtën, nuk e kam pritur një largim të Shehit.
Ka qenë diçka befasuese, pasi po bëheshim gati për datën e grumbullimin. Të vjen keq të mësosh se një mik largohet në një mënyrë të tillë kaq të menjëhershme. Gjithsesi, dua t’i uroj suksese, por është e pashmangshme të ndihemi bosh, pasi me Shehin largohet edhe një pjesë e historisë së lavdishme të Skënderbeut.
Gesi ka qenë motivuesi numër një, aq më tepër që ka ditur të mbajë ekipin të karikuar dhe të përqendruar në një vit tranzicioni. Të vjen vërtet keq për këtë largim. Përveç kontributit të tij si trajner, ishte më i vjetri i historisë së Skënderbeut europian dhe normalisht që eksperienca e tij do të na bënte mjaft mirë”, tha fillimisht 35- vjeçari.
DAJA – Më tej, kapiteni u ndal edhe te pasuesi dhe mbi të gjitha emri i Ilir Dajës, i cili shihet si kandidati potencial për të marrë drejtimin e Skënderbeut. “Të flasësh për Ilir Dajën si një alternativë, është një tregues tejet domethënës. I bie që ekipi do të rikthehet niveleve të larta, pasi me të në krye të stolit kemi realisht kujtime mjaft të bukura. Nuk e di se çfarë do të ndodhë, pasi është klubi ai që vendos për gjëra të tilla. Besoj se do të ishte zgjedhje e duhur për të marrë drejtimin e ekipit”, u shpreh ai.
KAS – Përtej zhvillimeve që ofron merkatoja dhe çështja e stolit, në Korçë e kanë mendjen të gjithë te KAS-i. Brenda datës 21 qershor pritet që Gjykata e Arbitrazhit Sportiv të dalë me një vendim final për dënimin 10-vjeçar që është dhënë nga UEFA, ndaj bardhekuqtë janë me “sy e veshë” nga Lozana.
Optimizmi për fillimin e pafajësisë është i lartë dhe kjo kuptohet edhe prej fjalëve të vetë Radasit. “Para së gjithash mbetet KAS dhe të gjithë jemi të vetëdijshëm.
Klubi na ka dhënë optimizëm dhe presim të qetë vendimin. Sinjale pozitive kemi dëgjuar shumë dhe kjo na bën të besojmë deri në fund. Vendimi i KAS-it do të jetë fundi i një makthi për ne, që ka nisur me pa të drejtë mbi një ekip, i cili ka bërë historinë jo vetëm në Shqipëri, por edhe në Europë”, përfundoi kapiteni.
/PANORAMASPORT.AL
