Kryeministri Edi Rama deklaronte një ditë më parë se zgjedhjet në 30 qershor do të zhvillohen pavarësisht asaj që deklaron presidenti Ilir Meta, por sot fushata elektorale e tij ka ndërruar tërësisht kah.
Në takimet e sotme elektorale Rama e k zhvendosur fushatën e tij në një sulm frontal ndaj presidentit Ilir Meta, ku deklaron se që prej ditës së djeshme ai nuk e meriton më titullin President.
‘Këtu nuk është çështja të shtyjmë një dasëm, por është çështja se nëse do të pranojmë të shtyjmë zgjedhjet do të hapim një rrugë pa kreu për shumë e shumë vite me radhë. Dje doli dhe presidenti kur protesta e tyre po pakësohej në numër dhe energji. Pikërisht kur morën një goditje shumë të rëndë nga SHBA ku u paralajmëruan me emër e mbiemër po të ushtronin dhunë ndaj një popullit të tërë, duke thënë se nuk do të lejojnë njerëzit të shkojnë në zgjedhje. Doli presidenti dhe thotë po anuloj zgjedhjet. Ajo që tha presidenti është njëlloj si të dilte dje të anulonte ndeshjen Islandë-Shqipëri, dhe të thotë arsyet do ua jap të hënë. Ai veproi si një drejtues opozite. Unë mendoj se që nga dje Ilir Meta nuk e meriton më titullin dhe figurën më të lartë të unitetit kombëtar. Ajo që ka bërë dje është përçarëse dhe luftënxitëse, nga pikëpamja politike një vetëvrasje, nga ajo ligjore një nul, dhe nga ajo morale një turp’, deklaroi Rama gjatë fushatës zgjedhore në Dibër.
