Dosja 339 dhe 184, të denoncuara nga opozita, si faktet dhe provat që lidhin drejtues të lartë dhe funksionarë të shtetit me grupe apo individë me precedent kriminale për manipulimin e votave në zgjedhje, vijojnë të prodhojnë debate, batuta, por edhe humor.
Mapo ka publikuar karikaturën e Bujar Kapexhiut, ku Edi Rama shfaqet me duar lart, pra i dorëzuar, përballë dosjes 339.
Gazeta gjermane BILD, më e madhja në Europë, ka publikuar 6 përgjime që i përkasin kësaj dosjeje. Përmes përgjimeve të publikuara kuptohet sesi drejtues të institucioneve, drejtues të PS-së, përfshi edhe kryebashkiakun Vangjush Dako, komunikojnë me Astrit Avdylin, i cili ishte në përgjim nga Krimet e Rënda, për një tjetër vepër penale, atë të trafikut të narkotikëve.
Vetë Dako ka mohuar që të ketë folur me Astrit Avdylajn, por nuk ka dhënë informacione se me kë ka komunikuar përmes numrit të tij.
