Taulant Balla, kryetari i grupit parlamentar të Partisë Socialiste, është i vetmi që flet me siguri në radhët e rilindësve për hapjen e negociatave me Bashkimin Eurpian këtë vit. Deklarata që në fakt rrëzohen nga qëndrimet e shteteve të ndryshe europiane, qëndrime kundër integrimit të vendit të drejtuar nga qeveria Rama, që sa vijnë dhe shtohen. Tanimë, vendimit kundër të Francës e përkrahur nga vende si Holanda dhe Belgjika, i është shtuar edhe Gjermania.
Taulant Balla ka nisur të gënjejë për negociatat fill një ditë pasi Komisioni Europian i rekomandoi Këshillit Europian hapjen e negociatave me Shqipërinë dhe Maqedoninë e Veriut. Nga foltorja e parlamentit u shpreh: “Në 2019 Shqipëria do hapë negociatat me BE”. Qëndrim që fakt kundërshtonte edhe atë të vetë kryeministrit Rama, i cili tha ditën paraardhëse se në KE, “gjykimi është politik”. Balla vijoi ta përhapë gënjeshtrën e tij në studiot mediatike. Madje, gënjeshtrën e artikuloi edhe gjatë vizitës lobuese në Berlin. Në një intervistë për median shtetërore gjermane “Deutsche Welle”, e përsëriti.
Megjithatë edhe Merkel, të cilën Balla e quajti një “luftëtare të paepur për zgjerimin e BE-së” del kundër integrimit të shpejtë të Shqipërisë nën drejtimin e qeverisë Rama. “Merkel i ka bërë një refuzim të qartë kërkesës së Komisionit Europian për hapje të shpejtë të negociatave të anëtarësimit”, raportuan këtë të premte mediat gjermane.
Mes shteteve që kanë shprehur qëndrimin kundër integrimit spikat Holanda. “Shqipëria ende ka një rrugë të gjatë”, tha Stef Blok, ministri i punëve të Jashtme në Holandë, njëkohësisht edhe eurokomisioner, duke i dhënë Tiranës zyrtare një mesazh të qartë. Në fund të muajit të kaluar, Parlamenti holandez ka zyrtarizuar tashmë kërkesën e tij për rikthimin e vizave me Shqipërinë, duke ia dërguar Komisionit Europian. Fakt që Taulant Balla e dinte kur shprehte sigurinë për hapjen e negociatave. Dhe sigurisht e di që vendimi për hapjen e negociatave rrëzohet nëse një nga shtetet del kundër. Megjithatë, në vend që dikush nga “Rilindja” të reflektojë për gjërat që nuk shkojnë, ata zgjedhin të vazhdojnë të gënjejnë, duke nxjerrë Taulant Ballën në rolin e Pinokut. /Boldnews.al/
