Zdenek Zeman nuk është alternativa e vetme nga tregu italian për stolin e Partizanit. “Panorama Sport” njoftoi para 3 ditësh se në listën e drejtorit Olsi Rama janë edhe dy trajnerë italianë.
Gazeta ka arritur të zbulojë se pas Zemanit, i preferuari i parë është Serse Kozmi, që njihet si një nga trajnerët më pasionantë në Itali, i cili ashtu si trajneri “bohem”, ka pranuar të hyjë në bisedime me të kuqtë.
Nga bisedimet e kryera me trajnerin Zeman është arritur parimisht akordi që 72-vjeçari të drejtojë Partizanin e sezonit të ri, që nis nga pjesëmarrja në Champions. “Panorama Sport” ka mësuar se gjatë bisedimeve mes palëve, Zeman ka rënë dakord për kushtet personale, gjë e cila i ka entuziazmuar emisarët e kuq në Itali.
Por, pak më vonë, situata ka ndryshuar dhe afrimi i Zemanit ka hyrë në proces ngrirje, pasi çeku ka parashtruar kërkesat e tjera që lidhen me stafin e tij. Pas dakordësisë së kushteve personale, mësohet se Zeman ka kërkuar që të zbarkojë në Tiranë bashkë me stafin e tij, rroga e të cilëve shkonte gati sa paga e 72-vjeçarit.
Kjo kërkesë s’është pranuar nga drejtuesit e kuq, të cilët në plane kishin vetëm Zemanin, duke ruajtur stafin që kanë. Nëse do të pranohet edhe kushti që çeku të mbërrijë bashkë me stafin e tij, i bie që vlera e investimit të dyfishohet, duke e bërë të papërballueshëm për Partizanin.
SERSE KOZMI- Nëse Zdenek Zeman nuk heq dorë nga kushti për të ardhur te Partizani me bashkëpunëtorët e tij, që mund të jetë një grup prej afro 7 vetash, drejtuesit e kuq do të venë në zbatim planin “B”. “Panorama Sport” ka mësuar se të kuqtë do të ulen në bisedime me Serse Kozmin, ish-trajnerin e Erjon Bogdanit te Siena në vitin 2012
