Kryeministri Edi Rama u ndal këtë të enjte në Cërrik në kuadër të fushatës për zgjedhjet e 30 qershorit.
Aktiviteti vjen një ditë pas përgjimeve që publikoi BILD nga dosja 339, e që treguan se si zyrtarët e lartë socialistë në Durrës bashkëpunonin dhe merrnin urdhra nga Astrit Avdylaj, një njeri i dënuar për vrasje dhe aktualisht në burg për trafik droge, për të ndikuar në zgjedhjet e fundit parlamentare në favor të PS-së.
Shefi i qeverisë nuk përmendi asnjë fjalë për përgjimet e prestigjiozes gjermane dhe fjalimin e tij e bazoi në sulmet ndaj opozitës, me thuajse të njëjtin fjalor si në ditët e fundit të fushatës elektorale.
Rama madje, u mburr duke u shprehur: “Kemi pak gjëra për të korrigjuar, s’jemi më të mirët e mundshëm por më të mirë se ne nuk ka pasur dhe nuk ka”.
Ndërkohë, tensioni politik sa vjen e rritet. Pas publikimit të përgjimeve, opozita ka kërkuar largimin e menjëhershëm të Edi Ramës nga drejtimi i qeverisë. Megjithatë, deri më tani nga ana e Ramës nuk ka asnjë hap para në këtë drejtim. Duket se objektivi është vetëm drejt pushtetit… /Boldnews.al/
