Nga Boldnews.al
Doktori i Shkencave në Krime Mjedisore, Ulsi Manja, kërkoi, me forcën që e karakterizon, që Prokuroria të vijojë hetimet dhe të marrë të pandehur këdo person që është përfshirë në dosjen “339/1”, ku zyrtarë të lartë përfshihen në biseda të regjistruara me anëtarë të bandave kriminale për vjedhjen dhe blerjen e votave në zgjedhjet e përgjithshme të vitit 2017.
Dr. Manja, i cili foli nga selia e Kuvendit, në cilësinë e Kryetarit të Komisionit të Ligjeve, në fakt e përsëriti më shumë se njëherë që shqetësimi i tij ishte “nxjerrja e sekretit hetimor”.
Manja kërkoi me forcë nga Prokuroria që të penalizojë këdo prokuror ose oficer të Policisë Gjyqësore që publikon të dhënat “sekret” nga dosjet hetimore. Doktor Manja duket shumë i shqetësuar për parimet e procedurës penale, nisur edhe nga fakti se vite më parë ka ushtruar detyrën e prokurorit.
Dr. Ulsiu, në fakt nuk është edhe aq parimor sa do të shitet. Shqetësimi i tij i madh për “sekretin hetimor” qëndron diku tjetër.
Vetë ai, dyshohet se është pjesë e përgjimeve të një dosje tjetër, asaj me numër 184, në të cilën po hetohet masakra elektorale në zgjedhjet e pjesshme lokale të Dibrës, në vitin 2016.
Burime të “Boldnews.al” flasin me siguri se doktor Manja është pjesë e përgjimeve të Prokurorisë për Krime të Rënda, në kuadër të dosjes “184”.
Dr. Ulsiu u shpreh prerazi se ai nuk mbron askënd që del në dosjen “339”. Për Manjën, kushdo që është regjistruar në atë dosje, të jetë pjesë e hetimit dhe të mbajë përgjegjësi ligjore,
A do të ketë të njëjtin qëndrim nëse, fjala vjen, Arta Marku, me nxitjen e Fatmir Xhafajt, do të publikojë zërin e tij në dosjen “184”?
Me shumë mundësi, nëse realisht ka përgjime të dr. Ulsi Manjës në atë dosje hetimore, dhe ai regjistrim gjen dritën e publikimit, atëherë Edi Rama mund të nxjerrë një “Ulsi” tjetër dhe t’i thotë “të vetmit dhe të vërtetit dr. Manja” se, “ia hape gropën vetes”.
