Skënderbeu është duke kaluar një moment pasigurie dhe dileme për të ardhmen, pasi gjithçka mund të ndryshojë në varësi të vendimit që do të marrë KAS-i për korçarët.
Në kushte të tilla, duket se gjithçka ka mbetur ende e paqartë se çfarë drejtimi do të marrë riorganizimi i ekipit për në sezonin e ardhshëm. Pavarësisht se klubi ka njoftuar mbledhjen e ekipit prej datës 11 qershor, paqartësitë janë ende të shumta për sa i përket së ardhmes.
Një gjë të tillë e di fort mirë edhe një prej ish-sulmuesve të ekipit të Skënderbeut. Ikona e klubit korçar, Dhimitraq Xhambazi, ka komentuar situatën ku ndodhet Skënderbeu pas përfundimit të sezonit të kaluar dhe pritjen nga KAS. Xhambazi e ka quajtur një sezon deri diku të vështirë për Skënderbeun, sidomos në pjesën e dytë të kampionatit, por arritja e objektivit duket se i ka shpëtuar korçarët, që tani janë me sytë te Gjykata e Arbitrazhit Sportiv për vijimin e sezonit të ri.
“Sezoni që la pas Skënderbeu mund të quhet me plot gojë një sezon me dy fytyra, për shkak të paraqitjeve që u ndanë në dy pjesë. Ishte një ekip i ri i riformatuar që, me sa duket, nuk arriti dot të përballojë presionin e të gjithë sezonit. Kjo, për shkak të mungesës së eksperiencës dhe deri diku cilësia te disa lojtarë, që nuk ishte e denjë për këtë ekip. E kam fjalën këtu për ata që u larguan pas janarit.
Fitoret radhazi krijuan imazhin se ekipi kishte të njëjtën mentalitet, por nuk ishte kështu. Humbjet e dobësuan skuadrën që reagonte keq dhe jo në vijimësi. Gjithsesi, me objektivin e arritur të një vendi në Europë duket se gjithçka është mbyllur disi pozitivisht. Tani mbetet vetëm KAS-i që kjo të bëhet legjitime. Vendimi që pritet të merret e mban Skënderbeun varur për sezonin e ri. Personalisht jam optimist dhe shpresoj se gjithçka do të mbyllet më së miri sikundër klubi pret”, theksoi fillimisht Xhambazi.
Ndryshimet – Për sa i përket sezonit të ri, për Xhambazin, nëse Skënderbeu do të kërkojë që të ngjitet atje ku i takon, ka nevojë për përforcime cilësore.Të paktën, sipas ish-sulmuesit, korçarët kanë nevojë për nga 2 afrime në secilin repart, që të krijohet një ekip kompetitiv.
“Të flasësh për sezonin e ardhshëm, duhet fillimisht që të shohësh sesi do të rrjedhin ngjarjet dhe sa do të lejohet që ekipi të luajë në Europë. Nga kjo që thamë më sipër varet shumëçka. Skënderbeu, nga ana e tij, besoj se bazën e lojtarëve e ka në përbërje.
Janë katërpesë futbollistë që mund të shërbejnë si bosht, duke pasur parasysh edhe ‘veteranët’. Por, që të krijohet një ekip kompetitiv që të luftojë për nivelet ku e kemi parë ne Skënderbeun, duhet që të paktën të ketë nga dy afrime në çdo pozicion. Bëhet fjalë për afrime cilësore që të mund të mbajnë peshën e një sezoni dhe mbi të gjitha të kenë mentalitetin e duhur të fituesit”, përfundoi Xhambazi.
/Panorama Sport
