Tërmetet që goditën Korçën në ditët e fundit kanë shkaktuar probleme në të paktën 310 banesa, nga të cilat 95 janë shkatërruar, ndërsa 212 janë dëmtuar më lehtë.
Banorët kanë kaluar natën në çadra, ndërsa ka ardhur edhe reagimi i parë nga qeveria.
Ministrja e Mbrojtjes Olta Xhaçka, ka shkuar sot në Korçë, ku ka vizituar nga afër banorët e prekur nga tërmeti.
Duke pranuar se situata ishte e vështirë, Xhaçka u ka siguruar banorëve se shtëpitë e të gjithëve që janë prekur nga tërmeti, do të rregullohen.
“Do të ndërtohet nga e para çdo shtëpi e rrënuar dhe do të demshpërblehen familjet për të riparuar shtëpitë me dëmtime të lehta”, tha ajo.
Xhaçka mori pjesë edhe në mbledhjen e Shtabit të Emergjencave Civile, ndërsa kërkoi nga institucionet vendore koordinimin e duhur për t’u ardhur në ndihmë banorëve.
Ministria e Mbrojtjes ka bërë një bilanc zyrtar se si paraqitet situata në qytetin e Korçës, pas tërmetit. Bëhet e ditur se në total janë 95 banesa të shkatërruara dhe 212 banesa me dëmtime të lehta.
Në fshatin Floq të bashkisë Korçë rezultojnë 65 banesa të shkatërruara, ndërsa 100 të tjera kanë pësuar dëmtime të lehta. Në fshatin Qafëzezë të bashkisë Kolonjë janë 18 banesa të shkatërruara dhe 71 të tjera me dëmtime të lehta.
Në fshatin Vidohovë të bashkisë Devoll janë 12 banesa të shkatërruara dhe 41 banesa me dëmtime të lehta. Fillimisht 160 banorë të fshatit Floq u strehuan nëpër çadra, por pas vlerësimit të shkollës së fshatit, një pjesë e tyre u akomodua në nëpër klasa.
