Dy shqiptarë, 35 dhe 28 vjeç, po përballen me drejtësinë në Belgjikë dhe rrezikojnë dënime me burg, përveç gjobave prej 8 mijë euro secili, për shkak se akuzohe se zotëronin një parcel me kanabis në banesën ku jetonin.
Dy shqiptarët, ndaj të cilëve ka nisur edhe procesi, jetonin në Jan Rosierlaan në Lanaken (Belgjikë). Në vitin 2018, policia zbuloi parcelën me kanabis, duke arrestuar dy shqiptarët, që flinin në katin e sipërm të banesës.
Vendimi për dy të arrestuarit pritet të jepet më 17 qershor, ndërsa ata kërkojnë lirimin nga akuzat. Policia gjeti plantacionin me 512 rrënjë kanabis. Çudia ka qenë se plantacioni shtrihej në 4 dhoma, ndërsa shqiptarët akuzohen se kanë përdorur energjinë elektrike në mënyrë të paligjshme.
Sipas të arrestuarit A. (35-vjeç), i cili jetonte fillimisht në Greqi dhe më pas në Gjermani, udhëtimi drejt Belgjikës, kishte si qëllim takimin me shokun e tij, M. (28 vjeç). Ai ka pohuar se ka gjetur një biletë të lirë avioni dhe ka shkuar të takojë mikun e tij.
Ai është shfajësuar duke thënë se nuk e di se kush e ka ngritur plantacionin. ADN-ja e tij u gjet në një spërkatës bimësh dhe në gërshërë.
Shqiptari tjetër rrëfeu se ai e dinte se kishte një plantacion në shtëpi, por pohonte se ai “kishte hapur vetëm rubinetin e ujit”.
