Niko Peleshi, ish/zv.kryeministër i Edi Ramës, thekson se arritja e një marrëveshjeje politike mes palëve mund të realzohet vetëm përmes dialogut. Në këtë kuadër, peleshi shprehet se nëse palët nuk ulen në dialog, atëherë nuk mund të pretendohet arritja e një marrëveshjeje.
“Që të arrish në një marrëveshje politike duhet të ulësh, të flasësh të dialogosh. Nëse PS, kryetari i partisë, kryeministri nuk do të kishte qenë i gatshëm të ulet në tavolinë diskutimi, pra edhe unë do isha me opinionin që PS po i ikën një marrëveshje të mundshme.
Ne e kemi përsëritur se jemi të gatshëm të dialogojmë dhe flasim. Themi që nuk jemi të gatshëm të diskutojmë mbi kushtetutën sepse nuk e kemi ne në dorë kushtetutën. Por nuk mund të pretendohet të ketë një marrëveshje kur njëra palë nuk pranon të ulet dhe dialogojë”, tha Peleshi në studion e Oraneës.
Përsa i takon deklarimeve të Presidentit Ilir Meta, që ka shprehur gadishmërinë për nxjerrjen e një tjetër dekreti për datën e zgjedhjeve, Peleshi shprehet se e vlerësonte deklaratën e Metës, i cili ofrohet siç i takon mes palëve për të bërë ç’është e mundur gjithçka ai ka në dorë për një kompromis apo zgjidhje të këtij ngërçi.
“Nga ana tjetër nuk besoj se mund të ketë pasur parasysh instrumente që tejkalojnë kushtetutën. Data e zgjedhjeve është shpallur nga Presidenti në limitin e vet kushtetues”, theksoi ai.
Deputeti i PS tha se kërkesa për qeveria tranzitore është një zgjatim i asaj që u bë në maj të 2017, duke theksuar se një gjë e tillë do të çimentonte një precedent të keq.
“Nëse do të ishte zgjedhje këtë herë atëherë qeveria e tranzicionit të jepet nga mazhoranca sa herë që ta kërkojë opozita edhe për arsye të paarsyeshme.
Nuk mendoj se nëse bëjmë diçka të ngjashme me marrëveshjen e 2017 do të dalim gjëkundi. Madje koha në tregoi se koncesioni që PS i dha opozitës duke i dhënë gjysmën e vet dhe shumë institucione, nuk besoj se një përsëritje e atij skenari do ti shërbente situatës.
Përkundrazi do të çimentonte një precedent të keq. Pretendimi i sotëm për një qeveri tranzitore është një zgjatim i asaj çka ndodhi në majin e para dy viteve.
Nuk them se ishte marrëveshje e keqe, por efekti anësor i një marrëveshje të mirë sic ishte 17 maji është ky që po paguajmë sot”, tha Peleshi.
