Për të tretin vit radhazi, Komisioni Europian i rekomandoi këtë të mërkurë Parlamentit Europian hapjen e negociatave me Shqipërinë dhe Maqedoninë e Veriut.
Progres-raporti – “Këshilli të hapë negociatat për Shqipërinë dhe Maqedoninë. Që të qëndrojnë të besueshëm vendet duhet të përmbushin detyrimet e tyre”, u shpreh Hahn. “Ka ende çështje të rëndësishme në rajon. Këto vende duhet të punojnë në shtetin ligjor. Nuk duhet të importojnë më refugjatë”, tha Hahn. Për vendet e Ballkanit Perëndimor, ai vuri në dukje si problematika emigracionin e lartë dhe lindjet e ulëta. “Ballkani perëndimor duhet të rrisë standardit e jetesës”, tha.
“Shqipëria ka ndjekur reforma kryesore në sistemin e drejtësisë duke përfshirë një rivlerësim të paprecedentë në rivlerësimin e personave të sistemit të drejtësie”, vlerësoi Hahn.
Precedentët – Ky është viti i tretë që Komisioni Europian i rekomandon Parlamentit Europian hapjen e negociatave për Shqipërinë.
Në vitin 2018 dhe 2017, KE rekomandoi hapjen e negociatave me Shqipërinë dhe Maqedoninë “në sajë të përparimit të arritur, duke ruajtur dhe thelluar hovin aktual të reformave”. Raportet e KE-së megjithëse u ndryshuan ndjeshën gjatë debateve në Parlamentin Europian, ato nuk u miratuan nga Këshilli i Evropës, që jep vendimin përfundimtar për hapjen ose jo të negociatave. Tre vite më parë, në 2016-ën, progres-raporti ku KE rekomandonte nisjen e negociatave pas plotësimit të pesë prioriteteve kyçe, -reforma në drejtësi, reforma e administratës publike, lufta ndaj korrupsionit, lufta ndaj krimit të organizuar, dhe mbrojtja e të drejtave të njeriut,- u miratua në Parlamentin Evropian pas disa muajsh, dhe me shumë ndryshime nga raporti fillestar. Megjithatë, në maj raporti nuk u miratua zyrtarisht nga Këshilli i Evropës, pasi Austria vuri veton.
Perspektiva – Edhe këtë herë ka gjasa që të përsëritet i njëjti skenar. Situata nuk ka ndryshuar me Francën si një kundërshtare me peshë e çeljes së negociatave, e përkrahur nga vende si Holanda dhe Belgjika. /bn/
