Oligarkisë po i numërohen orët mbrapsht, çmontimi i saj është prioritet i prioriteteve. Paralajmërimi është bërë nga kreu demokrat Lulzim Basha gjatë takimit në Fier, duke shtuar se nuk do të ketë asnjë kompromis me të keqen.
Basha ka deklaruar në favor të zhvillimit të referendumeve jo vetëm për çështje që prekin direkt interesat e qytetarëve, por duke përfshirë edhe zgjedhjen e Presidentit.
“Fatin e tyre qytetarët do e përcaktojnë me duart e tyre. Lehjet, ham hamet, kërcënimet për të kryer një tjetër krim zgjedhor, me një grup trafikantësh e zyrtarësh të kapur në përgjimet e prokurorisë, janë grahmat e fundit të një pushteti që bashkëpunon me krimin”, tha Basha.
Në vijim ai ka ftuar qytetarët që në 2 qershor të derdhen në Tiranë me një kushtrim: “Rama ik”.
“Beteja po shkon drejt fitores, atë se ka më në dorë pakica e politikanëve të bërë njësh me krimin, atë e kanë në dorë shqiptarët, që duhet t’a çojnë deri në fund betejën.
Betejën tonë do e zbresim në çdo rrugë dhe çdo shesh, duke i treguar qartë se lojrat me sovranin kanë marrë fund.
“Zgjidhja është e thjeshtë: nëse Edi Rama një herë në jetën e tij do të vendoste interesin tuaj e jo pasurinë dhe pushtetin e tij, largimi i tij i hap rrugë zgjidhjes politike, një qeverie të integrimit evropian që do të mundësojë zbatimin e kushteve.
Zgjedhje të lira e të ndershme, dënimin e politikanëve të kapur duke vjedhur votat. Nuk ka vend që i hapen negociatat një qeverie që vjedh votat. Zgjedhjet e lira janë rruga drejt BE-së. Ora po afron për fitoren e kësaj betereje, për çlirimin e Shqipërisë nga zgjedha e krimit. Koha ka mbaruar kur një njeri i vetëm vendos për shqiptarët.
Të majtë e të djathtë ti japim fund krizës dhe tranzicionit të tejzgjatur. Një parlament që iu takon ju e me deputetë që përgjigjen para jush e jo para kryetarëve, një parlament me një ose dy dhoma, një president të zgjedhur nga populli, ndarje pushtetesh, drejtësi të pavarur që ndëshkom politikanët, referendum popullor që mos ketë askush fuqi apo guxim që të mbushë xhepat e tij me afera korruptive, dekriminalizim të zgjedhjeve që partitë mos merren peng nga trafikantët, paketë anti-mafia kundër oligarkisë. 6 të babëzitur që kanë shtirë në dorë shqiptarët. Oligarkisë po i vjen fundi”, tha Basha.
