Nga Boldnews.al
Nuk kishte surpriza, Komisioni Europian rekomandoi vendeve anëtare të BE-së që të hapen negociatat për Shqipërinë dhe Maqedoninë e Veriut, si vende kandidate për në Bashkimin Europian. E pritshme, për më shumë raporti është i njëjtë më vitin e kaluar, ndonëse vendi ynë nuk i mori negociatat, edhe pse në Shqipëri nga politika qeverisëse u shit si fakt i kryer.
Eurokomisioneri Johannes Hahn tha se Komisioni rekomandon që Këshilli të hapë negociata me këto dy vende të Ballkanit Perëndimor. “Ne do paraqesim të njëjtin rekomandim për Shqipërinë dhe Maqedoninë e Veriut. Zbatimi i ligjit dhe stabiliteti mbeten disa nga pikat që duhet të zbatojnë këto vende. Sfida e tretë për këto vende është ekonomia. Vendet duhet të zbatojnë reforma në sajë të përmirësimit të ekonomisë”-tha Hahn.
Sipas tij, Shqipëria e Maqedonia e Veriut kanë ndjekur reformat. “Shqipëria ka çuar përpara reformat, veçanërisht një transformim të madh të sistemit të Drejtësisë, përfshirë një proces të paprecedentë rivlerësimi të gjyqtarëve dhe prokurorëve.” -vijoi më tej Hahn.
Asnjë reagim nuk pati mbi raportin, përveç diskutimeve dhe vlerësimeve të nisura drejt komisionerit të lartë Hahn dhe shefes së politikës së jashtme Mogherini. Por vendi ynë rrezikon seriozisht që të mos marrë edhe këtë vit negociatat.
Nga ky raport u entuziazmua kryeministri Edi Rama i cili në një postim në rrjetet sociale shkroi: “Rekomandimi pozitiv pa kushte i Komisionit Europian për çeljen zyrtare të negociatave për anëtarësim të Shqipërisë me Bashkimin Europian, konfirmon se Shqipëria i ka kryer me sukses detyrat e shtëpisë në këtë proces”.
E sado politikë të bëjë me këtë raport, Rama e ka të qartë se qeveria e tij dhe personalisht ai nuk është në gjendje që të bindë vendet skeptike se “i kemi bërë detyrat e shtëpisë”… Nëse këtë pjesë kryeministri nuk e kupton, është mirë që të konsultohet me Ministrin e Jashtëm, 28-vjeçarin Gent Cakaj, me 14 vjet përvojë të madhe politike, kombëtare dhe ndërkombëtare…
Raporti i Komisionit Europian do të kalojë për shqyrtim nga parlamentet dhe qeveritë e 28 vendeve anëtare të Bashkimit Europian. Është pothuaj e konfirmuar se Franca, Holanda dhe Belgjika do të vendosit kundër hapjes së negociatave me Shqipërinë.
Kjo kushtëzohet prej tyre nga të dhëna konkrete mbi shqipërinë si problemi i korrupsionit në nivele të larta qeverisëse, mosfunksionimi i shtetit ligjor, krimi i organizuar dhe emigrimi masiv.
Një vit më parë, ishte Franca dhe Holanda që qartësisht vendosën të bllokonin hapjen e negociatave me Shqipërinë, por tashmë këtë vit duket se i është shtuar edhe Belgjika. Kjo e fundit sheh problem kryesor kriminalitetin në rritje dhe emigracionin ilegal që vjen nga Shqipëria.