Rekomandimi i Këshillit të Europës, i publikuar ditën e sotme nuk ka lënë pa përmenduar edhe “ngërçin” mes kryeministrit Edi Rama dhe presidentit Ilir Meta për dekretimin e Gent Cakajt.
Në rekomandim shkruhet se zëvendësimi ministrit të Jashtëm, Ditmir Bushati çoi në polemika midis Kryeministrit dhe Presidentit duke krijuar edhe mangësi administrative që duheshin tejkaluar.
Pra marrja e postit të ministrit të Jashtëm nga vetë kryeministri Edi Rama dhe delegimi i detyrës ndaj Gent Cakajt, për KE-në është një boshllëk administrativ.
“Qeveria mbetet e angazhuar për procesin e integrimit në BE. Në dhjetor 2018, kryeministri bëri një riorganizim të konsiderueshëm të qeverisë. Nëntë pozicione të kabinetit u ndryshuan, duke përfshirë atë të Zëvendëskryeministrit dhe Ministrit për Evropën dhe Punëve të Jashtme. Zëvendësimi i këtij të fundit çoi në polemika midis Kryeministrit dhe Presidentit të Republikës për dispozitat kushtetuese lidhur me emërimet e ministrive. Ristrukturimi i ministrive dhe agjencive ka përmirësuar disa struktura ekzistuese, por ka krijuar edhe mangësi administrative që duhen tejkaluar. Reforma administrative territoriale duhet të konsolidohet më tej si pjesë e agjendës më të gjerë të decentralizimit. Kjo është veçanërisht e nevojshme për të garantuar autonomi lokale fiskale, për të siguruar ngritjen e kapaciteteve për personelin dhe për të fuqizuar bashkitë për të ofruar shërbime publike standarde cilësore”, thuhet në rekomandimin e KE.
Pas emërimit nga kryeministri Rama, më 10 janar presidenti Ilir Meta refuzoi të dekretojë ministër të Jashtëm Gent Cakajn. Në një letër prej 5 faqesh, ai argumentoi se Cakaj është pa përvojë, ndërsa në emisione televizive ka bërë deklarata me përmbajtje të rrezikshme lidhur me korrigjimin e kufijve. Meta thotë se Cakaj, ka punuar 7 muaj si zv.ministër pa certifikatë sigurie, dokument që e ka marrë brenda një ditë pasi është propozuar për ministër, më 3 janar 2019. Ndërsa kryeministri Rama e quajti antikushtetues refuzimin e Metës dhe argumentet e tij si skandaloze. Pas “ngërçit”, Rama u mori vetë postin e kryediplomatit, duke ia deleguar detyrën Gent Cakajt. /Dosja.
