Pritja ishte e gjatë. Pas plot 26 viteve, Partizani më në fund u shpall kampion i Shqipërisë, dhe tashmë tifozët e kuq, të shumtë në të gjitha qytetet e Shqipërisë, janë gëzuar pa masë nga ky lajm.
Një bastion i kuq njihet edhe qyteti i Sarandës, ku përveçse tifozë me “demat”, ka edhe grupe të organizuara, që e ndjekin shpesh Partizanin, madje ishin edhe në derbin ndaj Tiranës në stadium, ku u shpallën zyrtarisht kampionë.
Edhe pse titullin e kanë fituar prej ditësh, dhe 48 orë më parë ngritën edhe trofeun, në qytetin e Sarandës festa vazhdon akoma. Në disa video të siguruara nga “Panorama Sport”, duken tifozët e Partizanit, që në vendin e tyre të grumbullimit, i dekoruar edhe me flamuj e banderola të Partizanit, që kërcejnë e festojnë.
Dajre, firzamonikë, klarinetë, si edhe valle në mes të rrugës. Nuk mungojnë as fishekzjarret për ta ndezur akoma më shumë situatën.
