Edi Rama ka mbledhur prej orës 19:00 në një darkë informale deputetë dhe drejtues politik të qarqeve për të diskutuar mbi situatën politike në vend dhe zgjedhjet e 30 qershorit.
Takimi po zhvillohet në vilën qeveritare nr 31 në Tiranë, apo siç njihet ndryshe vila e ish-diktatorit Enver Hoxha.
Partia Socialiste ka deklaruar se zyrtarisht do të çelë fushatën për zgjedhjet e 30 qershorit të shtunën, ku pritet që gjatë paradites, socialistët të prezantojnë 61 kandidatët për kryebashkiakë dhe ekipet e tyre.
Ndërkohë që të dielën, ditën kur opozita do të zhvillojë protestën e 7 kombëtare me kërkesën e vetme “Rama ik”, kryeministri të shkojë në Lezhë ku do të çelë fushatën e Pjerin Ndreut që garon për kryebashkiak të qytetit.
Kërkesa e Ramës ndaj deputetëve ka qenë ajo që të bindin sa më shumë qytetarë të dalin në votime, ndërsa opozita nga ana e saj ka deklaruar se nuk do të ketë proces.
Duket se frika më e madhe e Kryeministrit është bojkoti masiv i zgjedhjeve, në kushtet kur opozita nuk është regjistruar në proces, dhe ka bërë thirrje se nuk do të ketë zgjedhje.
Në kushtet kur kriza politike sa vjen dhe thellohet, Rama ka menduar të thërrasë drejtuesit politikë sipas qarqeve dhe deputetë socialist në të njëjtën vilë ku vite më parë diskutonte dhe bënte marrëveshje politike me Ilir Metën, Presidentin aktual, që drejtonte LSI-në.
Kjo ka ndodhur në prag të zgjedhjeve lokale të 2015-ës, ku takimet zhvilloheshin nga vila 30 dhe 31, që në kohën e diktaturës njiheshin si vilat e Mehmet Shehut dhe Enver Hoxhës. Vijuan takimet në 2016, kur diskutohej reforma në drejtësi, për të kaluar në 2017 kur opozita e drejtuar nga Lulzim Basha kishte ngritur atë që quhej “çadra e lirisë” në bulevardin “Dëshmorët e Kombit”.
Tashmë edhe në 2019, Rama ka vendosur të shfrytëzojë një prej vilave qeveritare, por me një dallim, sot ai ka mbledhur të tijët pasi nuk ka asnjë alet në krah. /BN/
