Sipas të dhënave të autoriteteve, 55 të burgosur kanë vdekur nga shpërthimi i dhunës në katër burgje të pjesës perëndimore të Brazilit.
Pesëmbëdhjetë të burgosur u gjetën të vdekur të dielën, ndërsa 40 të tjerë u gjetën të vdekur të hënën në qytetin e Manausit, kryeqytet i shtetit të Amazonas. Lajmin e bëri të ditur guvernatori i këtij rajoni, Wilson Lima.
Lima tha se autoritetet besojnë që këto vdekje erdhën si pasojë e përleshjeve të dhunshme mes grupeve rivale brenga një bane të drogës, e njohur si Familja e Veriut. Për këtë arsye, nëntë udhëheqës të kësaj bande do të dërgohen në burgje të sigurisë maksimale.
Një zyrtar i burgjeve tha për një radio lokale se disa nga të burgosurit e vrarë të dielën ishin mbytur përmes shtrëngimit në fyt, ndërsa të tjerët përmes therjes me brusha të mprehura të dhëmbëve. Ndërkaq, të burgosurit që vdiqën të hënën humbën jetën nga mungesa e oksigjenit. Lima tha se ata u mbytën nga të burgosurit tjerë.
Grupet për mbrojtjen e të drejtave të njeriut e kanë akuzuar qeverinë për shkak të mungesës së masave për parandalimin e dhunës në burgje, të cilat janë bërë qendra rekrutimi të bandave kriminale. Ato e akuzojnë qeverinë edhe për numrin e madh të të burgosurve në hapësira të ngushta.
Burgu ku ndodhi dhuna të dielën ka kapacitet për 454 të burgosur, por në të ndodheshin mbi 900 njerëz kur shpërtheu dhuna, shkruan “CNN”,
