Skënderbeu është në fund të sezonit dhe në luftë të plotë për Europën. Arritja e objektivit është primare në kampin bardhekuq dhe një gjë të tillë e dinë të gjithë futbollistët e Skënderbeut.
Gjergji Muzaka është ndalur të analizojë sezonin e Skënderbeut. Në një intervistë për “Panorama Sport”, ai nuk ka dashur të bëjë vlerësimin e këtij viti pa u mbyllur kampionati, por ka folur për objektivin dhe të ardhmen. Muzaka u ka shprehur besnikëri bardhekuqve, pavarësisht sesi shkojnë gjërat në KAS.
Si do ta cilësonit këtë sezon të Skënderbeut, çfarë note do t’i vendosnit?
Kampionati ende nuk ka mbaruar dhe për pasojë nuk mund të flasim tani për një gjë të tillë. Mbeten ende dy ndeshje deri në fund të sezonit dhe ne duhet të shohim ecurinë tonë në këto takime dhe më pas kur të jetë mbyllur gjithçka, atëherë mund të flasim.
Kontrata përfundon këtë sezon. A e keni menduar se ku do të jetë e ardhmja e Muzakës nëse mbetet në fuqi dënimi për Skënderbeun?
Unë e kam bërë zgjedhjen time sezonin që shkoi, kështu që nuk mbetem peng i asgjëje. Personalisht vendosa të jem pjesë e këtij ekipi në një moment të vështirë dhe nuk ka më vend për diskutime se çfarë do të ndodhë me mua pas vendimit të KAS-it.
Çfarë ju lidhi kaq shumë me klubin korçar?
Përveç faktit që kemi arritur shumë suksese me këtë klub, m’u gjendën pranë dhe më hapën derën në një moment shumë të vështirë për mua. Çdo moment do të luaj për t’ia shpërblyer këtë besim.
Tirana po lufton për mbijetesë. A mendoni se ia del?
Jo vetëm unë, por i gjithë opinioni mendon dhe shpreson që Tirana të qëndrojë në Superiore. Sa për mua si Gjergj, nuk e kam fshehur asnjëherë që e kam pikë të dobët.
