Nga Boldnews.al
Në orët e fundit, kryetari i Gjykatës së Lartë, Xhezair Zaganjori, është në dilemën mes dorëheqjes “me nder” nga detyra e tij apo shtyrjes së ditëve deri sa Kolegji i Posaçëm i Apelimit të marrë vendimin për Vetingun e tij.
Pas shkarkimit të anëtarit Edmond Islamaj nga shkalla e dytë e Vetingut, mesditën e së Mërkurës, tashmë Gjykata e Lartë është jashtë funksionit.
Institucioni më i lartë i drejtësisë ka në detyrë vetëm 2 anëtarë, Zaganjorin dhe Ardian Dvoranin, i cili po qëndron në detyrë edhe pse ka rreth 5 vjet që i ka përfunduar mandati. Ky numër është i pamjaftueshëm për të krijuar trupat gjyqësore, të cilat ligji i parashikon me tre anëtarë.
Në këtë mënyrë, Gjykata e Lartë, deri në zgjedhjen e anëtarëve të rinj, një proces që nuk dihet se kur do të ndodhë, do të funksionojë vetëm si organ administrativ.
Në këto kushte, Xhezair Zaganjori është duke shqyrtuar mundësinë e dorëheqjes nga funksioni, si një sinjal ‘SOS” për institucionet përgjegjëse që të marrin në dorë zbatimin e Reformës në Drejtësi.
Burime pranë kreut të Gjykatës së Lartë deklarojnë për “Boldnews.al” se ai po shqyrton mundësinë për të dorëzuar mandatin e tij si gjyqtar i Gjykatës së Lartë.
Xhezair Zaganjori u zgjodh anëtar i Gjykatës së Lartë në Mars 2013. Një muaj më pas, ai u zgjodh kryetar i saj. Mandati i tij 9-vjeçar, si rregull, përfundon në vitin 2022. Por, mundësitë më të mëdha janë që ai të mos e mbyllë mandatin e tij të plotë.
Në Korrik 2018, Komisioni i Pavarur i Kualifikimit e konfirmoi në detyrë, pavarësisht problematikave të evidentuara me pasurinë e tij.
Operacioni Ndërkombëtar i Monitorimit (ONM) i rekomandoi Komisionerit Publik që të ankimonte vendimin e konfirmimit në detyrë për Zaganjorin. Në bazë të këtij rekomandimi, si edhe në analizën e kryer nga vetë institucioni, Komisioneri Publik kundërshtoi zyrtarisht vendimin e Komisonit të Vetingut, në Tetor 2018.
Prej më shumë se 10 muajsh, rasti i Zaganjorit nuk është marrë në shqyrtim nga Kolegji i Posaçëm i Apelimit (KPA).
Gjatë kësaj periudhe, pas largimit me shkarkim nga Vetingu apo për shkak të mbarimit të mandatit, Gjykata e Lartë ka funksionuar vetëm me 3 anëtarë. Njëri prej kësaj treshe, anëtari Islamaj, u shkarkua të Mërkurën nga Kolegji i Posaçëm i Apelimit.
Anëtari Ardian Dvorani është i vetmi që është konfirmuar me vendim të formës së prerë nga institucionet e Vetingut. Por ai po qëndron në atë detyrë përtej çdo afati kushtetues dhe ligjor.
Ndërkohë, kryetari Xhezair Zaganjori, i cili po pret shqyrtimin e rastit të tij në Kolegjin e Apelimit, tashmë duhet të merret vetëm me kontrollin e orareve të administratës.
Pikërisht, ky funksion vetëm administrativ, duket se e ka vënë kreun e Gjykatës së Lartë në dilemën për të vijuar ose jo detyrën e tij.
Xhezair Zaganjori nuk është dalluar për “forcë institucionale”. Ai është munduar të ruajë raporte të ekuilibruara me qeverinë e Edi Ramës. Falë këtyre raporteve, ai nuk ka ngritur asnjë zërin për problemet e theksuara të implementimit të Reformës në Drejtësi.
Dorëheqja e tij, për të cilën njerëz të afërt me Zaganjorin e konsiderojnë të sigurt, mund të jetë e vetmja gjurmë “force” që do të japë Zaganjori, para se të largohet përfundimisht nga sistemi gjyqësor.
