Pas një hetimi dy vjeçar policia e Durrësit i ka sekuestruar pasuri të paluajtshme me vlerë rreth 1 milion euro një 57 vjeçari pasi dyshohet se i ka fituar nga aktiviteti kriminal në Itali.
Atij gjithashtu i janë kapur edhe 30 milion lekët dhe rreth 6000 euro para të thata.
Xh.S është dënuar në itali me 3 vite dhe gjashtë muaj burg për ‘gjobëvënie’.
Policia njofton se “seksioni Kundër Pastrimit të Parave në Drejtorinë Vendore të Policisë Durrës në bashkëpunim me Prokurorinë e Durrësit, ka vënë në sekuestro një shumë të konsiderueshme të hollash dhe pasuri të paluajtshme të Xh.S., 57 vjeç, nga ky qytet”.
Pas një hetimi dy vjeçar të zhvilluar me metoda speciale – thotë policia – është arritur të dokumentohet se 57-vjeçari e ka përfituar këtë pasuri në bazë të aktivitetit kriminal të ushtruar në Itali. Ai është dënuar në Itali me 3 vjet e 6 muaj burg për veprën penale “Gjobëvenie e kryer në bashkëpunim”.
Në përfundim të hetimeve u bë sekuestrimi i llogarive bankare me vlerë 30 milion lekë dhe 5.770 euro, si dhe 7 pasuri të paluajtshme si truall, banesa, garazh, apartamente me një vlerë monetare në total rreth 1 milion euro.
