Aktivisti Andi Tepelena u shpreh se vendosja e kësaj takse do të rëndonte dyfish mbi shqiptarët, sa kohë që ata e paguajnë në çmimin e naftës dhe taksën e qarkullimit. Sipas Tepelenës qeveria nuk është konsultuar me grupet e interesit që preken nga vendosja e kësaj takse.
“Kemi të bëjmë sërish me një ofertë të pakërkuar, taksa e rrugës është antikushtetuese, pasi është paguar njëherë nga paratë publike. Është taksim i dyfishtë, ashtu siç ndodhi dhe me aksin Kukës-Morinë, ne paguajmë që t’iu bëjmë gati rrugën koncensionarit. Qeveria e bën gjithçka fakt të kryer, veçanërisht gjatë muajve të verës, ku vëmendja e publikut është e vogël.
Është një taksë e padrejtë, sa kohë që shqiptarët e paguajnë brenda çmimit të naftës taksën e qarkullimit, qytetarët shqiptarë duhet ta kuptojnë se çmimi i naftës po rrënon të gjithë ekonominë. Nuk është çështja vetëm te nafta që ne përdorim për mjetet tona, po është fjala për ekonominë në tërësi, edhe për furrën e bukës, që detyrohet që të rrisë çmimet, si pasojë e derivat ivë të naftës.
Këtu nuk ka asnjëherë debat me grupet e interesit, që duhet t’iu paraprijnë të gjitha këtyre marrëveshjeve. Kjo taksë do të rëndojë më shumë mbi xhepat e bizneseve, dhe ata duhet të jenë të parët që duhet të ngrenë zërin.
Duke u rritur kostot për biznesin, do të rriten edhe çmimet te qytetarët. Është periudha më e papërshtatshme, pasi nuk ka dhe një Gjykatë Kushtetuese, ku do të mund që të ankohesh”, u shpreh Tepelena.
I pyetur nga gazetarja Armela Ferko nëse aksi Tiranë-Durrës mund të konsiderohet një autostradë, Tepelena tha kategorikisht që jo, pasi nga taksimi i kësaj rruge do të preken dhe qytetarët e Durrësit dhe të qyteteve përreth.
Sipas tij që një rrugë të bëhet me pagesë, duhet që investimi të jetë i kompanisë private dhe jo me të ardhurat publike.
“Nuk kam parë në asnjë vend të botës që të paguash taksë në një rrugë që lidh dy qytetet, autostradat janë një gjë tjetër.
Rruga Tiranë-Durrës nuk është një autostradë, nëse duam një të tillë, le të dalë privati dh eta ndërtojë me paratë e veta, le të marrë përsipër dhe kostot dhe rreziqet.
Edhe zonja Balluku do të dalë e humbur nga kjo, krijohet një precedent i keq nga kjo, duhet të zgjidhet njëherë e mirë se cilat janë dhe konsiderohen asete kombëtare. Unë mendoj se do të ketë reagim, se kjo do të ishte dhe një vetëvrasje politike për qeverinë.
Nëse ne jemi para një fushate elektorale një vendim i tillë do të ishte katastrofal për vetë qeverinë.
Në ditët në vijim ne do të kemi edhe bisedime me biznesin, për të nxitur një reagim”, përfundoi aktivisti./ Fax Web /
