Banorët e 4 fshatrave në Levan të Fierit prej 3 javësh bëjnë roje për të mbrojtur pronat e tyre nga grabitësit e armatosur që i sulmojnë natën duke i vjedhur bagëtitë.
Situata e krijuar atje tregon një copëz nga Shqipëria larg qendrave të banuara apo fasadës, që shpeshherë sillet në vëmendje për të treguar zhvillimin.
Por banorët e 4 fshatrave, pasi janë lodhur nga denoncimet dhe premtimet se grabitësit do të kapen, kanë vendosur të mbrojnë pronat e tyre duke bërë roje natën.
“Mbi dy tre javë bëjmë roje natën. Jemi tmerruar ne por dhe fëmijët.
Në harkun e pak ditëve janë shënuar disa raste vjedhjesh. Në shenjestër janë vënë bagëtitë.
“Vjedhin viça, dhenë, lopë. Ne nuk kemi pasur vjedhje por tani kanë nisur radhë”, shprehen banorë të zonës.
Sipas tyre, ka një valë grabitjesh këto kohë, ku qëndron një grup deri në 6 personash që lëvizin të maskuar dhe të armatosur.
Banorët e Bishanit, Poros, Pishës e Martinës thonë se janë organizuar për të mbrojtur shtëpitë dhe bagëtinë
“Rrimë çdo natë bashkë dhe i kemi nxjerrë nga fshati. Kemi shkrepur dhe ndonjë çifte kush ka pasur. Shteti ose të vijë të vendosë postblloqe ose do i vrasim”
Banorët thonë se kanë denoncuar grabitjet në polici, por veç disa shoqërimeve, asnjë person nuk është vënë në pranga.
