KLGJ ka caktuar gjyqtarin e tretë për “çështjen Shullazi”, duke zgjidhur ngërçin që ishte krijuar me këtë çështje. Këshilli i Lartë Gjyqësor ka caktuar anëtar të trupit gjykues Valdete Hoxhën, gjyqtaren e Apelit Tiranë.
Çështja Shullazi po gjykohet te Apeli i Krimeve të Rënda. Për herë të fundit seanca u shty më 15 maj. Shkak u bë pikërisht mungesa e formimit të trupit gjykues, pas dorëheqjes dhe përjashtimit të gjyqtarëve kësaj çështje.
Në seancën e fundit, Gjykata iu drejtua Këshillit të Lartë Gjyqësor për të zëvendësuar gjyqtarin e përjashtuar. Seanca e radhës do të zhvillohet më datë 23 maj.
Në nëntor të vitit 2018, Gjykata e Krimeve të Rënda shpalli fajtorë për përvetësim pasurie, kërcënim, e grup të strukturuar kriminal, kreun e dyshuar të bandës Emiljano Shullazin, i cili u dënua me 14 vjet burg.
Po në shkallë të parë, bashkëpunëtori i tij Gilmando Dani u dënua 12 vjet burg, Endrit Qyqja dhe Endrit Zela me nga 10 vjet dhe Blerim Shullazi me 9 vjet burg.
Për akuzën e kërcënimit ndaj rektorit të UT, grupi u shpall i pafajshëm. /bn/
