Fitorja kundër Kukësit e ka lënë me trauma Skënderbeun. Sikur të mos mjaftonin tri mungesat e sigurta, katër të tjerë mbeten pezull për ndeshjen që vendos fatet e krejt sezonit. Qendërmbrojtësi Kaba Sambou dhe mesfushorët Shqiprim Taipi dhe Zani Kurti janë zyrtarisht “out” për Luftëtarin, megjithatë Orges Shehi mbetet i gjithi në ankth edhe për një tjetër qendërmbrojtës si Marko Radas, si dhe sulmuesit Dejvi Bregu, Blerim Krasniqi e Gjergj Muzaka.
I pari ishte në stol kundër veriorëve, por nuk mori asnjë minutë, për shkak të gjendjes jo të mirë fizike. Por, listës iu shtuan gjatë lojës edhe lojtarët e ofensivës, të cilët u dëmtuan dhe u detyruan që të zëvendësoheshin respektivisht në minutat 59, 79, dhe 86. Nëse për vlonjatin situata nuk është aq e rëndë (të paktën nga të dhënat paraprake), e njëjta gjë nuk mund të thuhet për tiranasin dhe fierakun.
Që të dy u larguan me barelë nga fusha, duke shkaktuar jo pak panik në radhët e bardhekuqve. Është ende herët për të thënë nëse do mungojnë apo jo, por e sigurt është që rrezikojnë 90 minutat e ardhshme. Vetëm sot, kur do të rinisin përgatitjet për javën e 35-të të kampionatit, mund të zbulohet diçka më shumë për gjendjen e tyre dhe shkallën e dëmtimit.
VENDIMI – Stafi mjekësor ka udhëzuar që futbollistët të kryejnë një kontroll mjekësor dhe më pas do të jepet fjala e fundit. Por, nëse ndodh më e keqja, atëherë trajneri do ta ketë tejet të vështirë për të ndërtuar 11-shen dhe sidomos në një sfidë që duhet të fitohet me çdo kusht. Zgjidhje tjetër për të kapur zonën “Euro” nuk kanë.
Një gjë të tillë e pohoi edhe vetë tekniku durrsak pas transfertës së luajtur me Kukësin në stadiumin “Kamza”, ndërsa tha: “Situata e mungesave është shqetësuese. Sot (pardje) u dëmtuan edhe Muzaka, Krasniqi e Bregu, duke iu shtuar edhe të tjerëve që kanë pasur probleme. Futbolli ky është, është për burra. Ka edhe lojë të fortë. Megjithatë, do të shohim çfarë do të bëjmë për të rikuperuar ndonjë kundër Luftëtarit. Dhe duhet pranuar që ky 90- minutësh është gjithçka për ne dhe do të jetë sfida më e vështirë”.
FORMACIONI – Kujtojmë që edhe me verilindorët, stafi teknik e kishte “arnuar” mbrojtjen. Pa Samboun që mungonte dhe Radasin që nuk e rrezikuan, qendra iu besua dy lojtarëve të rinj në moshë. Dyshja Lulaj-Pëllumbi luajtën nga minuta e parë e deri në fund dhe paraqitja ishte realisht pozitive.
Ndaj, nëse nuk do të ketë rikuperim deri në përballjen me Luftëtarin, Orges Shehi do të detyrohet që veç defensivës, të sajojë edhe sulmin. Megjithatë, shpresohet që të paktën të kthehet ndonjë prej Bregut, Krasniqit apo Muzakës.
