Partizani e mbylli me sukses sezonin tri javë para përfundimit të kampionatit, duke kthyer titullin kampion pas një pritjeje 26-vjeçare. Me objektivin e realizuar, në skenë kanë nisur të dalin disa shqetësime, të cilat ndikojnë në të ardhmen e skuadrës. Për momentin Partizani i bën llogaritë për Champions-in pa dy liderët e qendrës së mbrojtjes, Egzon Belica dhe Sodiq Atanda.
Të dy lojtarëve u mbaron kontrata në përfundim të muajt, kështu që në parim ka vend për “dhembje koke” në kampin e kuq. Mësohet se situata e të dy mbrojtësve është pezull, pasi asnjëri prej tyre nuk ka rinovuar me “demat”. Nuk dihet se cila është arsyeja e stepjes së dy lojtarëve, por gjasat janë që të dy të kenë oferta edhe nga jashtë dhe mund të lëvizin.
Për Belicën është raportuar para disa ditësh nga mediat turke se ka një interesim nga skuadra e Ligës së Parë, Menemen Beledije. Situata aktuale e dy qendërmbrojtësve pa kontrata bën që te Partizani të shtohet pasiguria në repartin defensiv.
Nëse Belica dhe Atanda nuk rinovojnë, pasi dëshira e klubit është që t’i mbajë, i bie që “demat” të mendojnë për një mbrojtje të re. Përveç dy qendrave, edhe mbrojtësit e krahëve, Ibrahimi dhe Trashi, janë lojtarë të adoptuar.
Mbase, duke dituat situatën “e ngrirë” të struganit dhe nigerianit, të kuqtë i kanë bërë ofertë kapitenit të Dritës së Gjilanit, Ardian Limani. Në momentin që doli lajmin për ofertën turke të Belicës, drejtori Olsi Rama pohoi se strugani e ka të qartë situatën, pasi e ka gati kontratën e re dhe pritet vetëm nënshkrimi.
