Prokuroria e Tiranës ka nisur hetimet lidhur me humbjen e vulës së fermanit 400 vjeçar në Arkivat e Shtetit. Duket se prokuroria ka reaguar pas njoftimit nga Drejtori i Përgjithshëm i Arkivit.
Në materialin e referuar në Prokurorinë e Tiranës, thuhet se në datë 10 maj 2019, pas një njoftimi nga drejtori i Përgjithshëm i Arkivave, për humbjen e vulës së fermanit të Manastirit të Kamenës, oficerët e Policisë kanë shkuar në vendin e ngjarjes.
‘Në ambientet e Drejtorisë së Përgjithshme të Arkivave, konkretisht në Godinën B, ku bëhej edhe skanimi i materialeve të formateve të mëdha, ishte konstatuar mungesa e një vule, e cila ishte pjesë përbërëse e një fermani të Manastirit të Kamenës”, ky është konstatimi i oficerëve të Policisë Gjyqësore të cilët kanë shkuar në vendngjarje.
Vula kishte qenë e lidhur nëpërmjet disa penjve me këtë ferman dhe për herë të fundit është parë që ka qenë në vendin e saj në datën 7 maj 2019, nga të gjithë punonjësit e Sektorit të Evidencës në Drejtorinë e Përgjithshme të Arkivave, shkruan Shqiptarja.com.
(Fermanet jane dekret të kohës së Turqisë-red) Rreth këtij problemi ka reaguar edhe drejtoresha e arkivave Nevila Nika.
“Vula është pjesë e një fermani të veçantë, të Sulltanit në gjuhën greke. Fermani i jep të drejtën e pronave Manastirit të Kamenës. Ndryshe nga vulat e tjera që kanë qenë prej dylli, kjo vulë është në material metalik, prej plumbi”, u shpreh Nika.
