Nga Boldnews.al
Dje në Tiranë pati një paradë dhe disa festime nga homoseksualët, të përfshirë në një shoqatë të pagëzuar me emrin LGBT.
Me një kujdes të veçantë, nën mbrojtje policore, për disa orë pjesëtarë të këtij komuniteti qëndruan në një nga zonat më qendrore të Tiranës, njëkohësisht më të frekuentuara në ditë normale nga familjarë dhe fëmijët e tyre.
Veç vështirësive që mund të jenë krijuar për t´u shpjeguar fëmijëve se ç´mund të jenë burra të shndërruar në femra, dy burra apo gra që puthen, në siklet dukej se ishin edhe policët, që me urdhër apo me plan, ishin të detyruar të qëndronin rreth zonës për të shmangur ndonjë incident të mundshëm.
Dhe përtej ndonjë komenti, talljeje, fyerjeve që mund të jenë hedhur, ajo që ndoshta është ndier si një mungesë, madje e theksuar nga homoseksualët, lesbiket, transvestitët dhe çdo kategori tjetër në LGBT, mosprania e çiftit të ambasadorëve Lu e Vlahutin, qoftë edhe përmes mesazheve.
Gjatë mandatit të tyre në Tiranë, diplomatët, njëri që përfaqësonte SHBA dhe tjetri BE-në, u përkujdesën me një zell të madh ndaj LGBT, madje nuk nguruan që të ishin pjesëmarrës edhe në një nga paradat e tyre.
Dhe jo vetëm kaq, shpesh krijonin përplasje me ligjvënës të caktuar që kishin guxim të flisnin hapur kundër LGBT-së. Vështirë se mund të harrohen paralajmërimet që Lu e Vlahutin, në emër të pozicioneve të tyre diplomatike bënin ndaj deputetëve, që s´mund të pranonin apo kritikonin shfaqje të tilla, në mes të ditës, në mes të kryeqytetit.
Në prill të 2018, dy ambasadorët, shumë të shqetësuar nga disa reagime deputetësh do të deklaronin:
“Asnjë i zgjedhur nuk duhet të shpreh qëndrime personale, pasi përfaqëson një elektorat të gjerë.
Çdo qytetar i Shqipërisë përfaqësohet nga ky Parlament dhe duhet të ketë të drejtën themelore të njohur dhe të mbrojtur pikërisht këtu.
Nuk ka të drejta më të mira apo më pak të mira, të gjitha të drejtat janë të barabarta. E kemi thënë gjithmonë, por mund ta përsërisim çdo ditë, anëtarësimi në BE është një zgjidhje të vlerave, respektimi i të drejtave themelore, toleranca pranimi i diversitetit janë vlera që janë themelore dhe përcaktojnë se cilët jemi si union”.
Në fakt, të njëjtët ambasadorë kurrë nuk përmendën përfaqësimin e elektoratit, mbrojtjen e qytetarëve dhe interesave të tyre nga Parlamenti, megjithëse mund të cilësohej si i vetmi, jo vetëm në Europë, por edhe më gjerë, kur në sallë gjeje njerëz me rekorde kriminale, nga vrasjet deri te trafiku i drogës.
Për të rikujtuar këtu, që dy diplomatët heshtën edhe kur faktohej kanabizimi i vendit, duke mos përmendur këtu se ajo drogë mund të përdorej nga nxënës shkolle, problem ky shumë më i rëndësishme se një tallje, ironi, domate apo vezë që mund të hidhej në drejtim të paradave të LGBT-së në Tiranë.
Ndaj në paradën apo festimet e fundit, mungesa e dy diplomatëve mund të jetë ndjerë shumë. Ndoshta LGBT nuk i ka shkuar në mendje të ftojë dy nga përkrahësit kryesorë, që me siguri mund të vinin ose në rastin më të keq mund t´i përshëndesnin me një letër, që do të pasqyrohej me shpejtësi.
Ishte një rast i mirë për të vlerësuar tolerancën e qeverisë ndaj një komuniteti, ndërkohë që shumica e shqiptarëve mbyten me gazin e Lleshit sa herë protestohet.
