Vendimi i sotëm i kancelarit të Austrisë, Sebastian Kurz për të dhënë dorëheqjen e për të çuar vendin në zgjedhje të parakohshme, pas video-skandalit ku përfshihej zëvendësi i tij (i cili vjen nga partia aleate, dhe jo nga partia e kancelarit) në blerjen e votave, tregoi edhe njëherë se cilat janë standardet Europiane.
Mjaftoi vetëm një video-përgjim, që kancelari austriak, pa u menduar dy herë të dorëheqje dhe të çonte vendin në zgjedhje të parakohshme, duke treguar edhe njëherë se sa larg këtij standardi është kryeministri i Shqipërisë Edi Rama.
Madje në fjalimin e tij të dorëheqjes Kurz do të tregonte edhe njëherë se ai nuk ishte në karrigen e kancelarit për interesat personale, por ishte aty për ti shërbyer qytetarëve që e kishin votuar.
‘…Unë nuk erdha në pushtet për karrigen time. As për të përmbushur një ego. Erdha për të dhënë ndihmesën për Austrinë por, unë nuk mund të qëndroj në pushtet në këtë situatë prandaj, sot jap dorëheqjen dhe thërrasë zgjedhje të parakohshme”,- tha Kurz në fjalimin e tij të dorëheqjes.
Por në Shqipëri një fjalim të tillë as mund ta ëndërrojmë ta mbajë kryeministri i Shqipërisë Edi Rama, pasi ai në vend të kërkojë falje kërcënon qytetarët.
Edhe pse ndaj vartësve dhe bashkëpunëtorëve të kryeministrit Edi Rama, ekzistojnë dosje voluminoze dhe ‘CD’me përgjime të cilat tregojnë se si rilindasit në bashkëpunim me krimin arritën të vidhnin dhe tjetërsonin votat e qytetarëve shqiptarë, madje edhe për vetë kreun e qeverisë ka përgjime, të cilat ndodhen në prokurori, por ky i fundit jo vetëm që nuk është i gatshëm të dorëhiqet, por është i vendosur të çojë vendin në luftë civile.
‘Zgjedhjet s’ka asnjë mundësi të shtyhen dhe asnjë shans të mos lejohen të zhvillohen. Kush pengon zgjedhjet dhe zgjedhësit do të dënohet me burg”, kjo është retorika që dëgjojmë çdo ditë nga Edi Rama.
Standardi Kurz dhe ai Rama
Mjaftoi vetëm ky veprim i sotëm i kancelarit të Austrisë, për të kuptuar se nuk është Europa që nuk e do Shqipërinë, por është Edi Rama ai që nuk e do Europën dhe po mban peng vendin në rrugën e tij drejt perëndimit.
Kreu i qeverisë shqiptare, nuk i njeh shumicën e ndërkombëtarëve jashtë trojeve shqiptare, madje i quan ata burokratë, por njeh shumë mirë ata që marrin rrogën tek zyra e tij.
Madje këtyre të fundit ju referohet vazhdimisht kur bëhet fjalë për të mbrojtur karrigen e pushtetit.
Sot kancelari i Austrisë dha dorëheqjen, në një vend ku Kushtetuta dhe Ligji janë të barabarta me zotin, ndërsa kryeministri i Shqipërisë Edi Rama, flet në emër dhe mbrojtje të Kushtetutës në një vend ku nuk ka Gjykatë Kushtetuese.
Pra për të kuptuar se përse ne nuk mund të jemi si gjithë Europa me Ramën kryeministër, mjafton të lexojmë fjalimin e Kurz sot para austriakëve dhe atë që na thotë Rama çdo ditë ne shqiptarëve. /Boldnews.al
