Skënderbeu është ‘Ambasador i Shqipërisë’ në Europë përmes futbollit”. Kështu u shpreh Ilirjan Përmeti në intervistën e dhënë për “Panorama Sport” pas një mungese të gjatë. Drejtori i klubit ka bërë një analizë të plotë të sezonit te korçarët, nga ndryshimet e shumta në ekip deri tek objektivi Europë.
Përmeti, nga ana e tij dhe në emër të klubit, uron Partizanin për titullin kampion që, sipas tij, ishte i merituar, por “thumbon” duke thënë se një meritë te ky titull e ka dhe ai për këshillat që i ka dhënë. Nga ana tjetër, drejtori i bardhekuqve flet edhe për fundin e ciklit në Korçë dhe planin për sezonin e ardhshëm.
Ku ka humbur Përmeti gjithë këto kohë? U bënë muaj që s’jeni “ndierë”?
Ndonëse do t’u duket pak çudi, por asnjëherë nuk më ka pëlqyer të jem një person mediatik. Nuk është se jam shumë aktiv në media dhe më pëlqen më shumë të punoj në qetësi. Një gjë e tillë është edhe parimi i punës sonë, jo vetëm e imja, por edhe e Skënderbeut si ekip.
Korçarët, në vit tranzicioni. Çfarë po ndodh me ekipin, nga Skënderbeu i titujve tani nuk kap dot Europën?
Natyrisht që ishte një vit jashtë të gjitha kontureve të Skënderbeut. E them këtë, pasi të gjithë ishim mësuar të shihnim një Skënderbe kampion. Vendi i dytë apo i tretë quhej dështim për këtë ekip, i gjashti, normalisht rëndon shumë. Ne pak a shumë, që në fillim e dinim që do të kalonim një vit të vështirë.
Kjo, jo për shkak të çështjes me UEFA-n, por për ndryshimin e lojtarëve. Unë e kam thënë që në fillim se kur të mbarojë ky cikël, do të kemprobleme. Pasi nuk është e lehtë të zëvendësosh lojtarë si Shehi e me radhë. Ishte një vit i vështirë, pavarësisht se me këtë ekip nëse gjërat do të kishin shkuar ndryshe, mund të ishim edhe në vendin e parë apo në vend të dytë.
Partizani, kampion këtë vit. Një titull i merituar?
Titulli i Partizanit vjen pas gjashtë vitesh dhe normalisht që në emër të klubit i uroj titullin. Është më se i merituar. Por është një titull që në njëfarë mënyre kam edhe unë meritën time. Një vit më parë i dhashë këshillën që të shikonte fushën dhe mos merrej me arbitrin. Më keqkuptuan, por sot shoh se kanë reflektuar dhe kanë merituar titullin kampion.
Skënderbeut i mungon cilësia apo është çështja e lojtarëve të rinj?
Për mendimin tim, nuk është një çështje e eksperiencës së klubit, as e cilësisë së lojtarëve. Ekipit ka cilësi. Ka vetëm një problem, është grup i sapoformuar e s’ka krijuar akoma statusin e të qenit kampion. Kanë ardhur shumë lojtarë që nuk e njohin fanellën e klubit dhe janë lojtarë që nuk kanë vijimësi. Ky besoj se ka qenë problemi ynë.
Cili është projekti i Skënderbeut për sezonin e ardhshëm?
Skënderbeu ka një strategji afatgjatë pune. Natyrisht, po presim të shohim sesi do të shkojë vendimi final dhe nëse do të kapim Europën apo jo. Europa është shumë e rëndësishme, por përpos kësaj, ne kemi gati planin për ringritjen e ekipit në nivelet ku i takojnë. Po punojmë çdo ditë për të bërë lëvizjet e duhura dhe natyrisht që sezonin e ardhshëm do të jemi atje ku na takon. Kemi bindje për këtë./PanoramaSport
