Maliqi zbardh abuzimet në burgje/ Tenderat kryhen në Ministrinë e Brendshme, drejtori me probleme…

Deputeti Lefter Maliqi u shpreh gjatë seancës plenare se është deklaruar shkarkimi i zv.drejtorit të Shëndetit Publik, ndërkohë që është ende në detyrë për shkak të lidhjeje me ish-ministrat.

Maliqi tha se drejtorët e burgjeve janë ish-ushtarakë, janë shumë të zotë, por janë kthyer në magazinierë.

“Nuk kanë asnjë kompetencë, janë emëruar nga politika, por edhe leje nuk japin dot. Keni lëvizur Arben Çukon, ish-deputet, i cili për shkak të bindjes partiake, me një zemër të madhe, e pësoi duke shkuar prapa hekurave.

Emëruat Stefan Çipën, ish-deputet dhe ish-zv.ministër, e mbajtët vetëm 4 muaj dhe e hoqët.

E nisi punën shumë vrullshëm, por faktikisht Stefani si babaxhan që është bëri zyrën e bukur, megjithëse nuk kishte as WC në Drejtorinë e Burgjeve, e hoqët pavarësisht se thoshte se do më venë si kandidat për Bashkinë e Sarandës.

Ju keni emëruar Drejtor të Përgjithshëm të Burgjeve një person që ka probleme shumë të mëdha.

Unë po ju pyes, ky person u emërua me meritë? Çfarë shkolle ka mbaruar ky, se deri në 2001 ka qenë polic.

Është liruar nga detyra për një përgjim, lidhur me Sokol Koçiun.

LEXO EDHE  Protestë para Parlamentit, çfarë po ndodh...

U shkarkua edhe nga detyra e Drejtorit të degës së Shitjeve. Nga Drejtor i Përgjithshëm i Ushqimit, që kur iku u bë festë, na e transferuat në Drejtorinë e Përgjithshëm të Burgjeve.

Shantazhon personelin dhe drejtuesit e burgjeve. Tenderat për burgjet bëhen në Ministrinë e Brendshme.

E dini ju se çbën ky, i shpjegon policeve dordolecin, i thotë e dini ju se çfarë është dordoleci? Policëve u thotë kaqolë.

Drejtori i Peqinit, drejtori i Elbasanit, janë ankuar te Taulant Balla për këtë Drejtor të Përgjithshëm dhe askush nuk i pret.

Damian Gjiknuri, Paulin Sterkaj, Xhemal Qefalia, e dinë shumë mirë se çfarë ndodh me burgjet dhe më kanë thënë se nuk e dimë si është emëruar ky drejtor”, tha Maliqi.

Më parë, ministrja e Drejtësisë, Etilda Gjonaj, ka shmangur problemet që sot evidentohen në sistemin e burgjeve, ndërsa i ka kushtuar vëmendje reformës së këtij sistemi.

Gjonaj tha se janë gjendur 131 persona me rekorde penale, të cilët janë larguar nga sistemi.

Sipas ministres së Drejtësisë, sot mbipopullimi në burgje është zero përqind.

Gjonaj tha se ka nisur aplikimi i vendosjes së aparaturave që bllokojnë valët të telefonisë së lëvizshme në sistemin e burgjeve.