Politika e komunizmit në Shqipëri me ardhjen e demokracisë, ose më saktë me tranzicionin e viteve 90 është zëvendësuar me atë pseudodemokratike, ku aktiviteti politik i sotëm nuk është asgjë tjetër veçse përdorimi i shoqërisë në mënyrë abuzive për mundësinë e artë të pasurimit përmes përdorimit të ligjit në favor, biznesit të pisët, kriminalitetit, trafikimit, drogës, kontrabandës e korrupsionit.
Prandaj pjesëmarrja në politikë synohet masivisht. I vetmi ndryshim i politikës së sotme nga ajo e para viteve 90, janë kostumet dhe kollaret me vlerë mijëra euro, që mbulojnë lëkurën e të ashtuquajturve politikanë, që me mjaf klas kanë imituar kameleonin.
Pra, demokracia e sotme mund të quhet mutacion komunist i imponuar me forcë nga Perëndimi.
Komunistët ish-funksionarë të devotshëm, gardistët më besnikë të diktaturës dhe pionerët e Enverit, ata më shëmbullorët të rritur, të përkëdhelur dhe edukuar në oborrin e sistemit, në këtë pseudodemokraci u bënë deputetë të përjetshëm, shtetarë e pushtetarë të lartë, presidentë e kryeministra.
Me hipokrizinë e reformave dhe të “rilindjeve”, u justifikua dhe po justifikohet “pastrimi”i administratës dhe i politikës duke promovuar pasardhësit e diktaturës dhe individëve pa personalitet, të paaftë e servilë që i binden lehtë urdhërave politikë dhe korrupsionit.
Janë këta persona që të drejtën “komuniste” të terrorit dhe të luftës së klasave e zëvendësuan me të drejtën “demokratike” të krimit e korrupsionit. Kjo ndodhi vetëm se drejtësia mbeti dhe u qeveris po nga ata juristë të pashpirt dhe kriminelë të ish-diktarturës, që me vendimet e tyre politike vranë, burgosën, persekutuan dhe internuan me qindra mijra shqiptarë për rreth 50 vite.
Pasardhësit e maskuar të komunizmit janë kapitalistët dhe monopolistët e politikës, pushtetit dhe ekonomisë, që nuk e kanë aspak e vështirë të vigjëlojnë, në mënyrë që askush tjetër të mos bëhet pjesë e përkatësisë së tyre, të mos lejohen të bëjnë bëhen pjesë e jetës politike, administrative, juridike etj.
Me pak fjalë në Shqipëri fantazma ideologjike e komunizmit, dhunës dhe frikësimit masiv u shndërrua në një kafshë grabitqare, materialiste, që ka korruptuar rëndë shoqërinë dhe e ka falimentuar sot shtetin. Ndaj jemi aty ku ishim, më të varfërit, më të pasigurtët dhe më të paintegruarit në Europë.
Me gjithë praninë, monitorimin dhe ndihmën e e SHBA-së e BE-së, akoma nuk kemi ndërtuar shtetin ligjor e me shumë gjasë situata do të vijojë e njëjtë, si një ndëshkim i vazhdueshëm, ku pasurimi i shpejtë, paraja e pisët, droga, bixhozi dhe sidomos korrupsioni, po i serviren në masë shqiptarëve si kulturë. /Boldnews.al/
