Një tribunë në dispozicion të ish-lojtarëve, zbardhet plani i Partizanit për festën e titullit kampion

Përfundimi i derbit të 153-të të kryeqytetit ka bërë që tifozët e Partizanit të kalonin çdo barrierë në stadiumin “Selman Stërmasi”, pasi gëzimi i tyre ishte thuajse përrallor. Rikthimi i titullit kampion pas 26 vitesh pritjeje. Festa e tifozëve ka zgjatur rreth 1 orë në ambientet e brendshme dhe të jashtme të stadiumit. Më vonë skuadra e ka festuar fitoren në derbi dhe titullin e 16-të në histori në një nga lokalet e kryeqytetit, ndërsa tifozët e kanë festuar sipas rretheve shoqërore.

Gjithsesi, klubi po përgatitet për festën e madhe të titullit kampion, ku pritet që të dorëzohet edhe trofeu zyrtar. Axhenda mbetet jo e saktë, ndonëse plani është i detajuar. Ekzistojnë dy variante për festën e titullit, pikërisht në javën e parafundit me Kukësin, që sipas kalendarit e kanë në shtëpi, ose në javën e fundit ndaj Luftëtarit. Festa në javën e fundit është e kushtëzuar nga fati i gjirokastritëve.

Nëse Luftëtari e arrin matematikisht mbijetesën në përfundim të javës së 34-t, mësohet se Partizani do të kërkojë mirëkuptimin e klubit gjirokastrit, por edhe të FSHF-së që ndeshja e fundit, që sipas kalendarit luhet në Gjirokastër, të zhvendoset në kryeqytet. Në rast të kundërt, pritet që festa e titullit të “demave të kuq” të zhvillohet në ndeshjen ndaj Kukësit, pikërisht në javën e parafundit. Partizani po përgatit një festë të madhe, më festivja e zhvilluar ndonjëherë nga një klub shqiptar, ku nuk do të mungojnë edhe elementet e një gëzimi mbarëkombëtar.

LEXO EDHE  E bujshme/ ‘Tërbohet’ Partizani, kërkon mesfushorin e kombëtares

“Panorama Sport” ka mësuar se klubi do t’u bëjë ftesë të gjithë ish-ëve që kanë veshur fanellën e kuqe dhe kanë kontribuuar për Partizanin. Është parashikuar që tribuna qendrore të jetë e gjitha për ish-ët, pasi ky titull që vjen pas 26 viteve, shkon si nderim për të gjithë ata që kanë sakrifikuar dhe kontribuuar për Partizanin gjatë historisë së tij 73-vjeçare.

festa tifozet partizani

Për momentin, fati i festës së “demave të kuq” varet edhe nga mbijetesa e Luftëtarit, por edhe nga federata nëse do të pranojë kërkesën e Partizanit që ndeshja me gjirokastritët të zhvendoset në Tiranë nëse nuk ndikojnë në verdiktet e kampionatit apo në dhënin e trofeut një javë para fundit në ndeshjen me Kukësin.